சிறை இலக்கியம் படைத்த சிந்தனைச் செல்வர் தோழர் பாலன் (1)&(2)

சிறை இலக்கியம் படைத்த சிந்தனைச் செல்வர் தோழர் பாலன் (1)

  July 11, 2022 • Viduthalai

தொடர்ந்த சுற்றுப் பயணங்களில் - வழமையான கடமைகளைத் தாண்டி, நேரத்தை- வாழ்வியல் எழுத எண்ணி ஒதுக்கிடும் நேரத்தை - கண்டு பிடிப்பது பெரிய சவாலாக அமைந்து விடுகிறது!

தூக்கத்தைக் குறைத்தால் எழுத முடிய வில்லையே என்ற இந்த ஏக்கத்திலிருந்து விடு படலாம் என்றுகூட இப்போது படித்த - 'தோழர் பாலன்' என்று பலராலும் பாசத்தோடு அழைக்கப் படும் தோழர் கே.பாலதண்டாயுதம் அவர்களது சிறை வாசக் குறிப்புகள் தொகுப் பான "சிறையில் துளிர்த்த சிந்தனை அரும்புகள்"நூலைப் படித்தேன்.

இந்த நூலை சுற்றுப்பயணத்தில் எஸ்மா. ஏ.ஆர்.எஸ். என்ற ஆசிரியைத் தோழர் (ஆலாம் பாளையம் அந்தியூர் வட்டம் - ஈரோடு மாவட்டம்) அளித்தார்.

ஒப்பற்ற கொள்கை வீரனான தோழர் கே. பாலதண்டாயுதம் எதையும் மறைக்காமல் பேசும் பண்புள்ளவர் என்பதை அவர் சென்னையில் இருக்கும்போது சில நிகழ்ச்சிகளுக்கு அழைத்துச் சென்று  பழகியபோது நேரில் கண்டு வியந்து மகிழ்ந்துள்ளேன்!

அவரது தியாக வாழ்க்கை, கொண்ட கொள்கை லட்சியங்களுக்காகவே தனது வாலிபத்தை சிறைக் கொட்டடியில் கழித்தும், மேலும் உறுதியான எஃகு உள்ளத்தோடு விடுதலை அடைந்து வெளியே வந்த போதும் - மாபெரும் லட்சியப் பீரங்கியாக  வாழ்ந்து - எதிர்பாராத மரணத்தால் நம்மிடமிருந்து பறிக்கப்பட்டவர்!

அண்ணாமலைப் பல்கலைக் கழகத்தில் 1938இல் போராட்டம் நடத்திய மாணவத் தலைவர் என்று பிரபலமானவர் அவர்.

55 வயது வரை மட்டுமே வாழ்ந்த அவரது வாழ்க்கை, விமான விபத்தால் முடிவுற்ற சோகத்தின் அதிர்ச்சி, இன்று நினைத்தாலும் வேதனையின் வெளிப்பாடுதான்!

பதவிச் சண்டை என்ற மலிந்த அரசியல் சந்தைக் கூச்சல்கள் நிறைந்த பொது வாழ்வுச் சூழலில், தனது வாழ்வையே கொள்கை உலைக் களத்தில் வார்த்தெடுக்கப்பட்ட ஓர் லட்சியப் போர்க் கருவியாக்கி வாழ்ந்தவரின், சிறை வாழ்வுச் சிந்தனைகள் சுருக்க கேப்சூல்களாக இருந்தாலும், அறிவின் வெளிச்சமாக தகத்தாய ஒளி வீச்சாக உள்ளது.

இந்த புத்தகத்தினை வாசிப்பதைவிட கற்க வேண்டியது முக்கியம் - பொது வாழ்வில் உள்ளோ ருக்கு  - என்ற பாடம் இந்நூலைப் படித்தவுடன் நமக்குக் கிடைக்கிறது!

தோழர் ப.பா. ரமணி தொகுத்த இந்த நூல் ஒரு சிறந்த சிறை இலக்கியமாகும்.

அரிய தொகுப்பு - ஓர் அருமையான சிந்தனை முத்துக் கோர்வை இது!

ஒரு பகுதி முன்பு தனி நூல்- இதில் புதிய இணைப்பும் தாங்கி, வெளியீட்டாளர்களான 'இந்திய கலாச்சார நட்புறவுக் கழகம் (ISCUF) கோவை', 'தமிழ்நாடு கலை இலக்கியப் பெருமன்றம் கோவை' ஆகியவர்கள் பாராட்டுக்குரியவர்கள்.

அந்த சிந்தனை அரும்புகளின் அழகுக்கும் - அறிவுக்கும் சில இதோ:

"19.02.1958, புதன்கிழமை

நாளையுடன் ரேடியோவிற்கு எழுதி ஒரு மாத காலமாகிறது;  ஞாபகப்படுத்தி எழுத வேண்டும். 

மன உறுதியை பலப்படுத்த புதிது புதிதான  வாதங்கள் தேவை என்று கூறப்படுகிறது. எனக்கு அவை தினசரி வந்து குவிந்த  வண்ணமிருக்கின்றன. 

சிறு தோணியில் உலகத்தைச் சுற்றிய கேப்டன் ஜான்வாசும் ஒரு மனிதன்தான்; சகாராவில் டஸ்ஸிலி மலையில் 16  மாத காலம் சித்திர வேலை களைப் படம் பிடித்த ஹென்றி லேயுட்டும் மனிதன் தான்; கியூரி தம்பதிகள் ரேடியம் கண்டுபிடிப்ப தற்காகப் பட்டபாடு (சினிமாவில் நான் பார்த்து பிரமித்தேன்) மனிதர்கள் பட்ட பாடுதானே; கிறித்துவ மதத்தைப் பரப்ப வந்த ராபின்சன் தமிழ் இலக்கியத்தைக் கரைத்துக் குடித்தான் என்று பார்க்கும் பொழுது,   எல்லாவற்றிக்கும் உயர்ந்த லட்சியத்தைக் கொண்ட நான், ஜென்ம தண்டனை பெற்று இருக்கும் பொழுது அவர்களைக் காட்டிலும் எத்துணை எத்துணை மடங்கு அதிக ஈடுபாட்டுடன், உழைப்புடன் விளங்க வேண்டும். இது ஆழ்ந்து சிந்திக்க வேண்டிய விஷயம்.

இன்னுமொரு கருத்தும் இதை பலப்படுத்திற்று. "வலியைத் தாங்குவது யுத்த வெற்றிக்குச் சமம்" என்று கார்க்கி கூறுகிறார். உடலைக் கிழிக்கிறோம்; அதனால் மனிதனைச் சுற்றிலும் மரக்க வைத்து ஆபரேஷன் செய்யும் பொழுது, கிழிக்கும் சப்தம் கூட கேட்கிறது. உடம்பை ஒன்றும் செய்வதில்லை. மரக்க வைக்காவிடில் அல்லது மயக்க மருந்து கொடுக்காவிடில் பொறுக்க முடியாத வேதனை ஏற்படுகிறது; இது உணர்ச்சி சம்பந்தப்பட்டது. வேதனையை சகித்துப் பழகிவிட்டால், உணர்ச்சியும் மரத்துப் போய்விடுகிறது. 

வேதனையைப் பொறுக்க விரும்பாத நாமே உயிருக்கும், உடலுக்கும் தீமையான காரியங்களை இன்பத்திற்காகச் செய்கிறோம்.

இது மடமை என்பது தெளிவு. இதில் இன் னொன்றும் இருக்கிறது. வேதனையைச் சகிக்கப் பழகப் பழக உயர்ந்த மட்டத்தில், உயர் தரத்தில், நிலையான இன்பம் பெறுகிறோம்.

அளவு கடந்த உழைப்புச் சக்தியைச் செல விட்டவர்களே சமுதாயத்திற்குப் பெரும்பங்கு செலுத்துகின்றனர். நைட்ரஸ் ஆக்சைடு கண்டு பிடித்த பிரீஸ்ட்லி ஆனாலும் சரி, போர்முனையில் வெற்றி கண்ட சுபகோவ் ஆனாலும் சரி, சளைக்காமல் உழைத்தனர்; ஆகவே சளைக்காமல் உழைக்கக் கற்றுக் கொண்டால் அது மிகப் பெரிய சாதனை. அதற்குக் கொட்ட வேண்டிய கண்ணீரையும், செந்நீரையும் தங்கு தடையின்றி கொட்ட வேண்டும்; நிற்க.

ஹைட்ரஜன் குண்டின் பயங்கரத் தன்மையைப் பற்றி எவ்வளவோ எண்ணங்கள் உதித்தன; ஆனால் மக்கள் மனதில் என்ன பிரதிபலிப்பு ஏற்பட் டிருக்கிறது என்பதைப் பற்றி நான் சிந்திக்கவில்லை. அதி அற்புதமான விஞ்ஞான  சாதனை மக்கள் மனதில் மூட நம்பிக்கையைத்தான்  ஏற்படுத்தியிருக் கிறது; கடந்தகால மூடக்கருத்துக்களுக்கு புதிய ஊக்கம் கிடைத்திருக்கிறது. உதாரணம், பிரளயம் வரும் என்று சொன்னது சரியாகப் போயிற்று என்பார்கள் இந்தியாவில்.

இரண்டாவது அம்சம், "மனித ஜாதி அழியாது" என்ற குருட்டு நம்பிக்கைதான் இது வரையிலிருந்தது. ஆனால், சமூக வளர்ச்சியை வரலாற்று ரீதியில் பார்க்கும் பொழுது விசேஷ தன்னம்பிக்கை ஏற்படுகிறது; நெருப்பை மனிதன் கண்டுபிடித்தது மனித நாகரிக வளர்ச்சியில் எவ்வளவு, புரட்சி கரமான மாறுதலை உண்டாக்கிற்று. 'பிரோமோ தியஸ்' போன்ற காவியங்கள்  செய்யப்பட்டன. அன்று "இது நல்லதுக்கு அல்ல, நெருப்பிலேயே மனிதன் அழியப் போகிறான்” என்று பலர் எண்ணியிருப்பார்கள். காலதேச வர்த்தமானப்படி, அணுசக்தி கண்டுபிடிப்பு இன்றைய நிலைக்கு அத்தகையது ஒன்றுதான். 

சிங்காரவேலு, சூர்யநாராயண ராஜூ, ஆறுமுகம், பொன்னு இவர்களை நினைந்து விட்டால் எதுவும் நிகரில்லை துணிச்சல் பிறக்கிறது. 

புதுக்கோட்டை வாழ்க்கையை வெறுக்கத் தூண்டுகிறது.

என் கண்ணில் பாரதிக்கும், கார்க்கிக்கும் ஏதோ ஒப்புமை - என்னவென்று சுட்டிச் சொல்ல முடியவில்லை. தோற்றத்தில் பொன்னுவுக்கும், ஆஸ்ட்ரோவ்ஸ்கிக்கும் ஏதோ ஒரு ஒப்புமை என் மனதில் பட்டுக் கொண்டேயிருக்கிறது. எஸ்.ஆர்.கே.யுக்கும், பி.ஆர்.க்கும் இருப்பதைப் போல. துல்ஜாவுக்கும் பயில்வான் அருணாசலத்திற்கும், உத்தாண்டிக்கும் இருப்பது போல, மழுங்கின உணர்ச்சிகள்தான் என் மனதில் ஏற்படுகிறதே யல்லாமல் திட்டவட்டமான, தீர்க்கமான, குணாதி சயங்கள், அம்சங்கள் என் மனதில் பதியவில்லை. ஆகவே, இப்பொழுது பொன்னுவைப் பற்றி எழுதப் புகுந்தால் மூடுபனியைப் பார்ப்பது போல தெரிகிறது.

இனி பேனாவும் கையும்தான்; கடந்த காலத்தை நினைத்துப் பார்த்து, உயிர்ப்பித்து அவற்றை அழியாது பொக்கிஷமாக்க வேண்டும்.

இனி என் கண்ணில் பட்டது, காதில் கேட்டது  பேனாவிற்குத் தப்பக்கூடாது. தப்பாது, உறுதி இது!

தினசரி பத்திரிகையினை குறிப்புடன்  படிப்பதில் காலதாமதமாகி, பாக்கி விழுந்து விடுகிறது. ஒன்று கருத்தூன்றி வாசிப்பதில்லை; படிக்கும்பொழுது, முக்கியமானதைக் குறிக்கும் பயிற்சி இல்லை. மற்ற, நேரங்கால மாற்றத்துடன் படிக்கும் முறையிலும் மாற்றம் தேவை"

(நாளை வரும்)

சிறை இலக்கியம் படைத்த சிந்தனைச் செல்வர் தோழர் பாலன் (2)

  July 12, 2022 • Viduthalai

சிறைச்சாலையில் தண்டனை அடைந்தவர்கள் அதற்காக வருந்தி வாடிக் கொண்டிருக்காமல் - கிரிமினல் குற்றவாளிகளைக் கூறவில்லை; (அவர்களிலும் கூட பலர் தங்களது அவசரப் புத்தி காரணமாகவோ அல்லது அடக்க முடியாத அறிவற்ற அசாத்திய கோபம் காரணமாகவோ தாங்கள் அதீதமாக நடந்து கொண்டு இன்று தண்டனையை அனுபவிப்பது பற்றி வருந்தியும், அதன் பிறகு திருந்தியும் வாழும் மனிதர்கள் பலரைப் பாராட்ட வேண்டும்).

அரசியல் காரணங்களுக்காக, கொண்ட கொள்கை லட்சியங் களுக்காக சிறைத் தண்ட னையை, கொள்கைக்குத் தர வேண்டிய கொள் முதல் விலையாகவே எண்ணி மகிழ்வுடன் ஏற்று வாழும் சிறை வாழ்வின்போது, சோம்பலை விரட்டி, சுறுசுறுப்புடன் சிந்தனை, செயலாக்கம், உடலும், உள்ளமும் நல்ல பயிற்சிகளோடுகூடிய கட்டுப்பாடு, வளர்ச்சி என்று - ஆனால் சிறைச்சாலை உண்மையாகவே அவர்களுக்கு "மாங்குயில் கூவிடும் பூஞ்சோலை"யாகவே திகழுவது உண்மை - இதற்குச் சரியான எடுத்துக்காட்டுதான் 'தோழர் பாலன்' என்று வாஞ்சையோடு அழைக்கப்பட்ட தோழர் கே. பாலதண்டாயுதத்தின் இந்த அரிய இலக்கியம் ஆகும்.

இலக்கு + இயம் = இலக்கியம் என்பதை ஏற்றால், இவரது கொள்கையான கம்யூனிச சித்தாந்த நடைமுறையே இவரது இலக்கு - அதற்கான கடுமையான போராட்ட வாழ்வை நடத்துவதே அவரது பாராட்டத்தக்க இந்தப் பங்களிப்பு ஆகும்!

படிக்க வேண்டும்; சிந்தித்தவற்றை தொகுக்க வேண்டும் என்ற திடசித்தத்துடன் அந்த தீரன் முடிவெடுத்த பின்னும், அவர் தொடர்ந்து தனது கருத்துகளை அன்றாடம் பதிவு செய்யத் தவற வில்லை!

இதோ மற்றொரு நாள் குறிப்பு:

23.08.1958, சனிக்கிழமை

“படிக்க வேண்டும், நிறையப் படிக்க வேண்டும். ஓயாமல் படிக்க வேண்டும்” என்ற கார்க்கியின் கருத்து இன்று என் மனதில் திடீரென்று பளிச்சிட்டது. இதற்கு இணையாக அவ்வைப்பாட்டி, “ஓதாமல் ஒரு நாளும் இருக்க வேண்டாம்” என்றாள். இந்த சிறந்த கருத்து எனக்குப் புதிதல்ல. ஆனால் சோம்பல் மோகினி இக்கருத்தையும் தன்வயப் படுத்தி விட்டாள். நாள் முழுதும் என்னால் படித்துக் கொண்டிருக்க முடியும், யாந்திரீகமாக. படித்து முடிந்ததும் என்ன படித்தாய் என்று கேட்டால் ஒன்றும் தெரியாது. 

இதற்குப் பரிகாரம் கேட்டால், படிப்பதற்கெல்லாம் குறிப்பு எடுப்பது. குறிப்பு எடுத்து தான் படிப்பது. இதற்கு இரண்டு தடங்கல்கள். 1) மெத்தையில் சாய்ந்து கொண்டு குறிப்பு எடுக்க முடியாது. ஏனெனில் அதுதான் சுலபமாகத் தூக்கத்தில் வழுக்கி விழுவதற்கு மிக மிக வசதியான ஏற்பாடு 2) குறிப்பு எடுக்க அதிக நேரம் பிடிக்கிறது. இதற்கு முறையான பதில் என்னவாயிருக்க முடியும், படுக்கும் பொழுதுதான் மெத்தையில் சாய வேண்டும்; குறிப்பு எடுக்கும் பழக்கத்தைப் பெற முடியும். அப்படியானால் முடிவு தெளிவு; 1) படுக்கும் பொழுது தான் படுக்கை 2) அனைத்துக்கும் குறிப்பு 3) முடிவுகள் நடைமுறைக்கு.

வெளி உலகத்திலிருந்து தகவல் இல்லாமல் இருப்பது உற்சாகக் குறைவுக்குக் காரணமாயி ருக்கிறது. மாதம் நெடுகிலும் வெளித்தகவல் வந்து கொண்டிருக்க வழி செய்வது எப்படி ? அடுத்த மாதம் முடியாது. ஏனெனில் 1-ஆம் தேதி இந்த மாதம் வந்து குவிந்திருக்கும் கடிதங்கள் கொடுக்கப் படும். பின் அம்மாதக் கடைசிவரையில் பின் கடிதங்கள் இல்லை. இதைத் திருத்த வேண்டுமானால் இம்மாதக் கடிதங்களை இழக்கத் தயாராக வேண்டும். தியாகங்களின்றி எதையும் திட்டப்படி சாதிக்க முடியாது.

செர்வாண்டிஸ் அசகாய சூரன்; டான்குய்க் ஸாட்டுக்கு இணை குய்க்ஸாட்டுத்தான். அந்தக் காலத்தில் சின்னஞ்சிறு ஸ்பெயினில் இத்தகைய மாபெரும் அமர இலக்கிய சிருஷ்டிகர்த்தா இருந்தான் என்பது வியப்பைத் தருகிறது.

மனித சுபாவத்தை அப்படியே நமக்குப் படம் பிடித்துக் கொடுத்து விட்டார். அவ்வளவு பெரிய நவீனம். எங்கும் தங்கு தடையின்றி ஓடுகிறது. சரித்திரத்தின் திருப்பத்தைச் சுட்டுகிறது. மார்க்ஸ், செர்வாண்டிசை தலைசிறந்த Romantistஆக பால்சாக்குடன் இணைத்துக் கூறியது முற்றிலும் பொருந்தும். 

சிறைதான் சோம்பலின் உறைவிடம்; சோம் பலைப் போல் மனிதனுக்கு வேறு விபத்தே கிடையாது, எனலாம். எல்லா விஷயங்களிலும் அது ஊடுருவிப் பாய்ந்து உருக்குலைத்து விடுகிறது. எனக்கு சமீப காலத்தில் எழுந்துள்ள புதிய சபலங்கள் எல்லாம் சோம்பல் பிறப்பிப்பவை. ஆதலின் ஒவ்வொன்றிலும் சோம்பலின் கைத் திறனை துருவித் துருவி ஆராய்ந்து அறிந்து களைந்தெறிய வேண்டும். அதுவே, பழைமை யிலிருந்து முறித்துக் கொள்வதாகும். அடுத்தபடி ஏறுவதாகும்."

'அடுத்தபடி ஏறுவது' என்று அவர் குறித்ததைப் படித்தபோது, ஒரு சிந்தனை என்னுள் பளிச்சிட்டது! அதை உங்களோடு பகிர்ந்து கொள்வதில் மகிழ்கிறேன்.

"படிக்கட்டுகள் உயரே செல்வதற்குத்தானே ஒழிய - உட்கார்ந்து ஓய்வெடுப்பதற்கல்லவே" என்பதே அது!

எவர் படிக்கட்டில் கால் வைத்து உயரே செல்ல முனைகிறார்களோ அவர்கள் வாழ்வில் வெற்றி பெற்றவர்கள் ஆகிறார்கள். உட்கார்ந்து ஓய்வெ டுக்க முனைவோர் தாங்களும் உயராது, படிக் கட்டின் பயனையும் பாழடிக்கிறார்கள் - இல்லையா?

(நாளையும் வரும்)

சகிப்புத் தன்மை - ஓர் உயர்த்தும் ஏணி! (1)(2)

வாழ்வியல் சிந்தனைகள் - கி.வீரமணி

  June 21, 2022 • Viduthalai

 

ஒரு குழுவில் பத்துப் பேர் இருந்தால் (உண்மையில் அய்ந்து பேருக்குள் இருப்பதையே மேல் நாட்டு அறிஞர்கள், ஓர் குழு  Group - என்றும், அதற்கு மேல் எண்ணிக்கைக் கூடினால், அது 'குழு' அல்ல 'கூட்டம்' - Crowd  என்றுமே கூறுவதுண்டு).  அதில் உள்ள ஒவ்வொரு வரும் வெவ்வேறுபட்ட மனப்போக்கும், குணாதிசயங் களும் கொண்டவர்களாக இருப்பது இயல்பான ஒன்றாகும். ஆட்டு மந்தையல்ல மனிதர்கள்!

அலுவலகங்கள், இயக்கங்கள், தனி இயக்கம், நிறுவனம் முதலிய எல்லாவற்றிற்குமே இந்த உண்மை பொருந்தக் கூடும்! ஒவ்வொருவருடைய சிந்தனைகளும், விருப்பு- வெறுப்பு மனோபாவம், இவற்றிலும்கூட பளிச்சென்ற வேறுபாடுகள் இருக்கும்!

இப்படி பல தரப்பட்ட கருத்துகள், சுவைகள், சிந்தனைப் போக்குகள் - இவைகளைக் கண்டு சிலர் ஏனோ ஒரு வகை வெறுப்பை உமிழ்வது உண்டு; வெளிப்படையாகக் காட்டா விட்டாலும் கூட, அந்த வெறுப்பை மனத்திற்குள்ளே வைத்து அழுத்திக் கொண்டு சகிப்பற்று "ஏனோ முக பாவத்தை" சிலர் காட்டும் வகையில் நடந்து கொள்கின்றனர். கெட்டிக்காரர்களான சிலர் அதனைப் புறந்தள்ளிவிட்டு, உரையாடுவதும் சம்பிரதாய வகையில் உண்டு.

இதைத் தாண்டிய உயர் தனிப்பண்பு எது என்றால், அதை சகித்துக் கொள்ளும் உளப்பாங்கு தலையாய பெருமை அளிப்பதாகும்.

"பொறுமை கடலினும் பெரிது" என்பது ஓர் பழமொழி. அதைவிடப் பெரிது சகிப்புத் தன்மை! எந்தவித எதிர் பதில், எதிர்வினையும் - உடனுக்குடன் சூடானபதில் அளித்து சமூக உறவை, கலக வெறுப்பினை வெளிச்சமாக்கிக் காட்டுவது என்பது என்றால் சிறிதும் ஏற்க இயலாத ஒன்றாகும்!

கடும் எதிரிகள்கூட நம் இல்லந்தேடி வருகின் றார்கள் ஏதோ ஒரு உதவியை நாடியோ அல்லது வேறு காரணத்தாலோ நம் குடியிருப்புக்கு வந்தால், அவரை மன ஒதுக்கீடு (Mental Reservation) இன்றி, அன்புடன் வரவேற்பது உயர் தனிப் பண்பு ஆகும், தவறல்ல.

இதனால் நாம் தாழ்ந்துவிட மாட்டோம். மாறாக, உயர்த்தப்படும் மனிதராக சமூகத்தின் முன் காட்சியளிப்போம்.

அந்தப் படிக்கு இல்லாவிட்டாலும்கூட, அதாவது அது நம்மை உயர்த்திக் காட்டாவிட் டாலும்கூட நமது மனச்சாட்சி மூலம் நாம் உயர்த் தப்பட்ட மனிதராகவே உலகத்தில் இறுதிவரை உலா வந்து கொண்டே இருப்போம்!

இது உறுதி - உண்மையும்கூட, அன்னை 

ஈ.வெ.ரா. மணியம்மையார் எவ்வளவு வசவுககள் "ஆபாச அர்ச்சனைகள்" அவதூறு மொழிகள் இவைகளை சந்தித்தார். அவரது கடல் போன்ற சகிப்புத் தன்மை அவரை இன்று மிகப் பெரிய அளவில் உயர்த்தி விட்டதே! பல துன்பங்கள், துயரங்கள் எதிர்பாராத துரோகங்கள், ஏச்சுகள், ஏளனங்கள் இவைகள் எல்லாம் கலந்ததுதான் வாழ்க்கை. சகிப்பின் எல்லை அல்லவா அவர்!

இவற்றை எதிர்க் கொண்டு வாழ்வது தவிர்க்க முடியாதது என்பதைவிட, இதனை சகிப்புத் தன்மையோடு ஏற்று வாழக் கற்றுக் கொண்டால், அதைவிட பெரிய வெற்றி வாழ்வில் ஏதுமில்லை  - நண்பர்களே உணருங்கள்!

ஒரு குழுவில்கூட, எவர் எவரிடம் என்ன நல்ல பண்பு, பழக்க வழக்கம், தனித் திறமைகள் உள்ளன என்று நீங்கள் கண்டறிகிறீர்களோ, அதை முன்னிறுத்தி, அவர்களோடு கனிவோடு பழகி, நட்புறவோடு நல்ல செயலாக்கத்தை நாளும் பலப்படுத்திக் கொள்ள முயலுங்கள். அவர்களது பலவீனங்களை அலட்சியப்படுத் துங்கள்  - அதற்கேற்ப வேலைவாங்குகள்.

சகிப்புத் தன்மையுள்ளவர்கள் எவரும், வாழ்வில் தொடர் தோல்வியில் புரளவே மாட்டார்கள்; வாழ்வில் உயரவே செய்வர். 

புராண காலத்து 'முனிவர்கள்' என்றாலே கோபப்படுகிறவர்கள்  - (முனிபு - கோபம்) சாபம் கொடுப்பவர்கள் என்கிற அவசரக்காரர்கள்.

இது அவர்களையும் பின்னுக்குத் தள்ளும் - உயர் குணம், மாமனிதம், சகிப்புத்தன்மை என்பன பேராயுதங்கள் - அவற்றை ஏந்துங்கள்!

வாழ்வியல் சிந்தனைகள் - கி.வீரமணி

  June 22, 2022 • Viduthalai

 சகிப்புத் தன்மை - ஓர் உயர்த்தும் ஏணி! (2)

சகிப்புத் தன்மை - என்பதற்கு “பொறையு டைமை" என்ற தலைப்பில் வள்ளுவர் திருக் குறளில் பத்து குறள்களை அடக்கிய ஒரு தனி அதிகாரத்தை உருவாக்கியது மட்டுமல்லாமல், அவரோ அல்லது அதற்கு தலைப்பிட்டவர்களோ "பொறையுடைமை" என்றே அருமையான தலைப்பைத் தந்துள்ளது ஏன் என்று மிகவும் ஆழமாகச் சிந்திக்க வேண்டிய ஒன்றாகும்.

பெறற்கரிய செல்வங்களில் ஒன்று பொறுத்தல் - சகித்தல் - ஏற்றல் என்று நாம் அடையவேண்டிய அறிவுச் செல்வங்களில் ஒன்றாகவே இதனை விளக்கியுள்ளது வியப்புக்குரியதல்லவா?

அவ்வதிகாரத்தில் ஓர் அருமையான குறள் - எப்படி பொறுத்தல் மனிதனை உயர்த்தும் என்பதை விளக்கும் வகையில் அமைந்துள்ள தோடு, பண்புகளில் தலையாய பண்பாக மனிதர் கள் வாழ்வில் கற்று நிற்க வேண்டிய ஒன்றினையும் விளக்குகிறது.

"பொறுத்தல் இறப்பினை என்றும் அதனை

மறத்தல் அதனினும் நன்று" (குறள் 152)

இதன் கருத்து: 

"பிறர் நமக்கு இழைக்கும் தீங்கைப் பொறுத்துக் கொள்ளுதல் என்பது, எப்பொழுதும் போற்றப் படும்; அத்தகைய தீங்கினை நினைவில் கொள் ளாமல் அறவே மறந்துவிடுதல் என்பது அப்படிப் பொறுத்தலைக் காட்டிலும் மிக்க நல்லதொரு செயலாகக் கொள்ளப்படும்."

(நாவலர் உரை)

பொறுத்தலை ஏற்காது மறுப்பவர், ஒறுத்தலை - (தண்டிப்பதையே) விரும்புபவர்களாக இருப் பவர் பலரும் பழிவாங்கும் "மிருக உணர்வுக்கு" தங்களை சிறைக் கைதி போல கூண்டுச் சிறைக் குள் அடைத்துக் கொள்ளுகிறார்கள்; ஆனால் உண்மையான மனிதமோ - மன்னிக்கத் தெரிந் தவன்தான் மனிதன்; மன்னிக்கத் தெரிந்தவனை விடக் கூட ஒரு படி மேலானவன் மறக்கத் தெரிந்தவன் என்ற தத்துவத்தைவிட மனிதகுல வாழ்க்கைக்கு நல்ல வழிகாட்டும் நெறி வேறு உண்டா?

பழைய காலத்தின் சட்ட வகைகளில் கூட, அடிக்கு அடி, வெட்டுதல் முதலியவையே சரியான தண்டனை என்று வழங்கப்பட்டு வந்த சட்டங்கள் இருந்தன. அறிவு முதிராத காலத்து விதிகள் அவை.

‘அடிக்கு அடி, பல்லுக்குப் பல்' என்பது ஹமுராபி (Hummurabi Code) என்ற ஆரம்பக் காலச் சட்டம். 

அதன்பின் சட்டத்தில் இப்படி தண்டனையில் கூட உயர் ஜாதிக்கு லேசான தண்டனை அல்லது விடுதலை, ஒடுக்கப்பட்ட பிரிவு ஜாதியான ‘சூத்திரா‘ பஞ்சமர் போன்ற சங்கர ஜாதி என்று கலப்பு மணத்தால் - வாழ்வில் பிறந்தவருக்குக் கடுந் தண்டனை என்று விதிகள் விதித்த சட்டமே இருந்தது.

குற்றவாளிகளை பேதப்படுத்தி தண்டனை வழங்குதல் என்ற கொடுமையான - மனிதத் தன்மையற்ற செயற்கைத் தன்மையான வர்ண பேதங்களை வாழ வைத்த சட்டம் இப்போது வலுவிழந்த நிலையில் அவர் புதிய அவதாரம் எடுக்க அதனால் பயனடைவோர் முயற்சித்தனர்.

ஆனால் பிரிட்டிஷ் ஆட்சி வந்த பிறகே, அந்த வன் கிரிமினல் சட்டம் நீக்க, சீர்மையான தண்டனைச் சட்டம் I.P.C. (Indian Penal Code)  வந்தது.

அதன் கருத்தியலும் இப்போதுள்ள தண் டனை வழங்குதல் சட்டத்தின் அறிவு வெளிச் சத்தில் மாறுபட்டு, குற்றம் செய்தவர்களை திருந்தி வாழச் செய்ய அவர்களை ஒறுத்தல் - தண்டிப்பது கடுமையாக என்பதைவிட, அவர்களை மனம் திருந்தி வாழும் நல்ல மனிதர்களாக வாழ வைக்க அரசும், சட்டங்களும், நீதித்துறையும் சிந்திப்பதும் சகிப்புத் தன்மையை அடித்தளமாகக் கொண்டு எழுந்த சிந்தனைகளேயாகும்!

Revenge or Reformation என்பது போன்ற கேள்வி எழுந்து, பழிவாங்குதலால் மானுடத்தைத் திருந்தி வாழச் செய்ய முடியாது! மன்னித்து மறு வாழ்வினைத் தர மாற்று வழி வரை சிந்திப்பதே நல்ல மனிதம் தழைக்கும் மானுடத்தை உருவாக்க முடியும்.

இதற்கு மூலபலம் சகிப்புத் தன்மையே - இல்லையா?

சிங்கப்பூரின் புத்தகக் கடையின் "மறைவுக்குறிப்பு" (Obituary)

வாழ்வியல் சிந்தனைகள் - கி.வீரமணி

  June 16, 2022 • Viduthalai

 

சிங்கப்பூர், இலக்கிய நண்பர் இலியாஸ் ('செம்மொழி' இதழின் ஆசிரியர்) ஒரு செய்தியை அனுப்பியிருந்தார்: அதை அப்படியே தருகி றேன்.

" 'நாலெட்ஜ் புக் சென்­டர்’. பிராஸ் பாசா காம்பி ளெக்­சில் அமைந்­தி­ருக்­கும் இந்­த பழைய புத்­த­கக் கடை­யைப் பெரும்­பா­லோர் அறிந்­தி­ருப்­பர்.

45 ஆண்டுக்கு மேல் செயல்பட்ட பழைய புத்தகக் கடை விடைபெறுகிறது

1978ஆம் ஆண்­டில் இருந்து அந்­தக் கட்­ட­டத்­தில் செயல்­படும் இந்­தக் கடை விரை­வில் வாடிக்­கை­யா­ளர்­க­ளி­டம் இருந்து விடை­பெ­ற­வி­ருக்­கிறது.

1975ஆம் ஆண்டு முதல் பாடப் புத்­த­கங்­கள், மதிப்­பீட்டு ஏடு­கள், ‘டென் இயர் சீரிஸ்’ எனப்­படும் கடந்த பத்து ஆண்­டு­களில் நடை­பெற்ற தேசிய அள­வி­லான தேர்­வுத் தாள்­கள் எனக் கல்வி சார்ந்த பொருள்­க­ளுக்­குப் பெயர் பெற்­றது இந்­தப் புத்­த­கக் கடை.

பள்ளி, கல்­லூரி, பல்­க­லைக்­கழக நிலை­யி­லான பழைய புத்­த­கங்­களை வாங்க விரும்­பும் பல­ரும் நாடும் இட­மாக இருந்து வந்­துள்ள இந்­தக் கடை இன்­னும் சில வாரங்­களில் மூடப்­ப­டக்­கூ­டும் என்று 'ஸ்ட்­ரெய்ட்ஸ் டைம்ஸ்' அறி­கிறது.

குறைந்த விலை­யில் கல்வி சார்ந்த பழைய பொருள்­களை வாங்­கும் பல­ருக்­கும் இது ஏமாற்­ற­மாக அமை­யக்­கூ­டும்."

மறைந்த மனிதர்களுக்கு மட்டும்தான் நாம் 'மரணக் குறிப்பு' (Obituary) எழுதி எமது வருத்தம், துயரம், வேதனைகளை வெளிக்காட்டி ஆறுத லடைகிறோம்.

அதைவிட முக்கியம்; 'மறைந்த புத்தகக் கடைகள்' - மூடுவிழா காரணமாக! பல ஆண்டு அறிவு ஊருணிகளாக நம் பகுத்தறிவை, படிப்பறிவை, பட்டறிவை செழுமைப்படுத்திட்ட அறிவாயுதங்களான புத்தகங்களை விற்பனை செய்த புத்தக நிலையங்கள் மூடப்பட்டால், அதற்கு எழுதும் 'மரணக் குறிப்பு'  நமது துயரத்தை ஆற்றுப்படுத்திக் கொள்ளுவது ஆகும்!

காரணம் மனிதர்கள் மறையலாம்; ஆனால் அவர்களது சிந்தனைகளும், கருத்தியல்களும் மறையாது, மனித குலத்தை ஒழுங்குபடுத்தி நமது அறிவுத்தாகத்தைத் தீர்க்கும் தொண்டற தண்ணீர்ப் பந்தல்கள் அல்லவா அவைகள்?

பல ஆண்டுகளாக சிங்கப்பூர் ஆர்ச்சேட்  (Orchard) சாலையில் இருந்த 'பார்டர்ஸ்' (Borders) புத்தக விற்பனையகம் - உலகளாவிய நிலையில் சில ஆண்டுகளுக்கு முன் மூடப்பட்ட போதே நான் இதுபோல் வாழ்வியலில் எழுதி வருகிறேன்!

இப்போது அங்கே வேறு சில கடைகள் உண்டு; (அங்கே எமக்கென்ன வேலை?)

அந்த 'பார்டர்ஸ்' (Borders) புத்தகக் கடை, இரண்டு கல்லூரிமாணவர்கள் ஒரு காபிஅவுசில் உரையாடத்  துவங்கி சிறப்புடன் பன்னாட்டுச் சங்கிலி (International Chain) உருவாக்கிப் பரப்பினர்.

அமெரிக்க பொருளாதார வீழ்ச்சிகளின் தாக்கம் இதனையும் பதம் பார்த்ததுபோலும்!

சிங்கப்பூரில் இப்போது மேலே காட்டப்பட்ட புத்தகக் கடை பழைய புத்தகக் கடை - புதிய புத்தகங்களைவிட பழைய அரிய - புத்தகங்கள் அங்கே கிடைப்பது மிகப் பெரிய நல்வாய்ப்பு.

பிராஸ்பாஷா (Brasbasha Complex) என்ற பகுதியில் நான் பல முறை தோழருடன் சென்று பழைய நூல்கள் பலவற்றை வாங்கியுள்ளேன். பெரிதும் இஸ்லாமிய சகோதரர் அதிலும் பாபநாசம், பண்டார வாடை, அய்யம் பேட்டை, மயிலாடுதுறை தோழர்கள்தான் கடை "முதலாளிகள்". என்னை அடையாளம் கண்டு அன்புடன் உபசரித்துப் புத்தகம் தருவர்! சென்னையில் பழைய புத்தக விற்பனைத் தொண்டு செய்வோருக்கு 'பெரியார் விருது' கொடுத்தும் பாராட்டியுள் ளோம்!

பல விமான நிலையங்களில் புதிய புத்தகக் கடைகள்தான் வழக்கமாக இருக்கும்.

அமெரிக்காவில் உள்ள விஸ்கான்சின் (Wisconsin) மாநிலத்தின் பெரு நகரங்களில் ஒன்றான மில்வாக்கி  (Millwakee) விமான நிலையத்தில் அருமையான பழைய புத்தகக் கடை சிறப்பாக இருந்தது கண்டு வியந்து நூல்கள் வாங்கினோம். அரிய நூல்களின் தொகுப்பினை டாக்டர் சோம. இளங்கோவன் வாங்கி  சென்னை பெரியார் திடல் பெரியார் பகுத்தறிவு நூலகம் - ஆய்வகத்தில் அன்பளிப்பாகவும் தந்ததை மறக்கலமா?

இந்நிலையில் அந்த புத்தகக் கடை விற்பனை நண்பர்களுக்கு நமது வாழ்த்துகள் - அந்த இடம் சிங்கப்பூரின் பிரபல பல மாடி தேசிய நூலகம் அருகில் உள்ள பகுதியாகும்.

நினைவில் நீங்கா பிராஸ் பாஷா புத்தக நிலையமே... மனதில் வாழ்கிறாய்! மறைய மாட்டாய்! 

குறைந்த சுமை; நிறைந்த வாழ்வு - மறக்காதீர்!

வாழ்வியல் சிந்தனைகள் - கி.வீரமணி

  June 15, 2022 • Viduthalai

 

எளிமையான வாழ்வே எப்போதும் இனிமை யான நாளாகும்! நம்மில் பலருக்கும் அதைச் சேர்க்க வேண்டும்; இதை வாங்க வேண்டும் - நம் பிள்ளைகளுக்கு, வருங்கால சந்ததிகளுக்கு என்று ‘அரக்க பறக்க' ஆலாய்த் திரிந்து சேர்க்கும் எந்தப் பொருளும் கூட கடைசியில் - பட்டினத்தார் பாடியபடி ‘காதற்ற ஊசியும் உந்தன் கடைவழிக்கு வாராது காண்' என்பதுதானே மிச்சம்!

தனக்கென ஒரு சுயநலத்தின்படி பொருள்களை, சொத்துக்களையும் தவறான வழிகளையும் கூட கடைப்பிடித்து சேர்த்த ‘கோடீஸ்வர்கள்!' (நம் நாட்டில் கோடி ரூபாய் சேர்த்து விட்டால் கடவுளுக் குச் சமமான ‘சீட்' கிடைத்துவிடுகிறது!) என்ன விநோதம்! பாரீர்!!

பலரும் இப்படிச் சேர்த்த சொத்துக்கள் மூலமாக மகிழ்ச்சியா அடைகிறார்கள்?

துன்பம்! தூக்கம் தொலைந்த நிலை! நீங்கா மன அழுத்தம், இரத்தக் கொதிப்பு, சர்க்கரை நோயின் அதிவேகம் - இப்படி பல நோய்களின் காரணி யாகவே அந்த அலைந்து அலைந்து சேர்த்த சொத்துகள் உள்ளன!

ஆனால், அதே சொத்துக்களை அறப் பணி களுக்குப் பயன்படும் வகையில் சுயநலம் தலை தூக்காத சமூக நலம், மக்கள் நலம் சார்ந்த அமைப் புகளை உருவாக்கித் தலைமுறை தலைமுறையாக அவை பயன்படுவது நல்ல தொண்டறம் ஆகும்!

சென் புத்த அறிஞர் - ஜப்பானிய பவுத்த அறிஞர் ஷண்மியோ மாசூனோவின், ‘Don't Worry'  என்ற நூலில் உள்ளவாறு, "வீட்டில் கூட தேவையற்ற பொருள்களை வாங்கித் திணித்து வீட்டை ஒரு கிடங்கு போல் ஆக்கிக் கொண்டால் அது வீட்டுக்குப் பாரமல்ல - மன திற்குத்தான் பெரும் சுமையாகும்!

அவரவர் தேவையைப் போல நம்மில் பலரும் பொருள்களை அடுக்கி அடுக்கி வைப்பது தேவை தானா?

நமக்குள்ள தேவையற்ற ஈடுபாடு காரணமாக இந்தப் பொருள்கள் சேர்ந்து கொண்டே வருகிறது!

நம்மில் பலருக்கும் பழையனவற்றைக் கழித்து விட - பிறருக்குக் கொடுத்து விட மனம் வருவ தில்லை; புதியன சேர்வது நம் வீட்டை குப்பை மேடாக்கித் தான் வருகிறது.

தேவைக்கு மேல் எதையும் வைத்தால் அதனால் ஏற்படுவது மகிழ்ச்சி அல்ல - மன அழுத்தம்தான்.

இடையில் திருடர் பயம் - கொள்ளைகள் - நிம்மதியற்ற பயம்தான் மிச்சம்!

என்னே குளறுபடியான வாழ்க்கை! இப்படி அதிகமாக வைக்க இடமின்றி அடைப்பதால்  (Dumping) யாருக்கு என்ன பயன் என்ற கேள்வி மிகவும் நல்லது!

இவை இல்லாத நண்பர்க ளுக்கோ அல்லது அறக்கட்டளை கள், அலுவலகங்கள், பள்ளிகள், விடுதிகள் இவற்றிற்குக் கொடையாக அளித்து மகிழலாமே!

பயனுறு பணியாகும் அது!

தொலைக்காட்சி விளம்பரங்கள் கண்ணுறும் குடும்பத் தலைவிகள் நுகர்வோர் கலாச்சாரத்தில் மூழ்கு வதால், கண்டதையும் - தேவையைப் பற்றிச் சிறிதும் கவலையற்று வாங்கி, வாங்கிக் குவித்துத் தேவையற்ற பொருள் குவிய லைத் தான் - பணத்தின் மதிப்பைப் பற்றி சிறிதுகூட யோசிக்காமல் நடந்து கொள்வது நம்மை தாழ்த் துமே தவிர உயர்த்தாது!

"எதையும் எடுக்காமல் நடந்து பழகுங்கள்" என்ற ஒரு சொற்றொடர் (Walking hand-in-hand).

எனவே எவ்வளவு குறைந்த தேவைகளோடு வாழ முடியுமோ அதன்படியே வாழக் கற்றுக் கொள்!"

நம் கண்கூடாக பார்த்தவரை தந்தை பெரியாரும், அன்னை மணியம்மையாரும் அல்லவா?

"எது உங்கள் உலகம்?" நல்ல கேள்விதான்! (1)

வாழ்வியல் சிந்தனைகள் - கி.வீரமணி

  June 06, 2022 • Viduthalai

 "எது உங்கள் உலகம்?"  நல்ல கேள்விதான்! (1)

வாழ்க்கையில் பலரும் மனக்கவலையோடு வாழ்ந்து கொண்டிருப்பது, நியாயமான காரணங் களை விட கற்பனையாக நாமே தேவையற்று வரவழைத்துக் கொள்ளும் கவலைகளே - கற்பனைகளும், ஊகங்களும் கலந்து முளைத்துத் துளிர்விட்டு மிரட்டும் கவலைகளே அதிகம் என்கிறார் ஜென் (Zen) புத்தநெறி அறிஞர் ஒருவர்.

புதிதாக ஜப்பானிலிருந்து எழுதி வெளி யாகியுள்ள 'Don't worry' என்ற தலைப்பில் 'ஷண்மியோமாசூனோ' என்ற பவுத்த சிந்தனை யாளரின் நூல் பல்வேறு சிறந்த அனுபவ உரைகளை சிறு சிறு தேன் துளிகளாக 48 கட்டுரைகளைக் கொண்டதாக உள்ளது!

'இளைப்பாறிட' மிகவும் நல்ல நூல். படித்த பிறகு சிந்தித்து அசைபோட்டு மனதில் இருத்தி, வாழ்வில் பயன்படுத்திப் பார்த்துப் பயன் பெற வேண்டிய கருத்துரைகளின் தொகுப்பாக அமைந்துள்ளது!

"நாம் மூன்று உலகில் வாழ்கிறோம்" என்கிறது  புத்த ஜென்நெறி என்னும் நன்னெறி. 

முதல் உலகம் கடந்த காலம்   (Past) 

இரண்டாவது எதிர்காலம் (Future)

மூன்றாவது நடைமுறையில் உள்ள நிகழ்காலம் (Present)

இவற்றில் மிகவும் உண்மையாக நாம் வாழ்வது நிகழ்காலத்தில்தான். ஏனோ நம்மில் பலரும்  மற்ற இரு வேறு உலகைப் பற்றியே சிந்தித்து - வருந்தியும், பயந்தும், கற்பனை பீதி களில் ஈடுபட்டு - அச்சத்தின் மடியில் தேவையற்று விழுந்து அழுது புரளும் அவலம் உள்ளது

தற்போது கையில் உள்ளவற்றை எதிர் கொள்வது, பயன் பெறுவது பற்றியே சிந்தித்து செயலாற்றுவதே சரியான அணுகுமுறை. வரு முன் காப்பது தான் தேவையே ஒழிய, வருவ தெல்லாம் ஆபத்து என்று அதிக பயத்தில் தேவையற்ற மனக் குழப்பத்திற்கு ஆளாகக் கூடாது!

நடந்தவற்றிலிருந்து பாடம் பெறலாமே தவிர, அவற்றை எண்ணி, மீண்டும் அப்படி ஒன்று நிகழ்ந்து விடுமோ என்று அஞ்சி சாவதில் அர்த்தமே இல்லை!

பல பேருக்கு கடந்தகாலம் என்பது - என்றும் அச்சுறுத்தி நிகழ்கால இன்பத்தைப் பறிக்கும் மின்னலாகவும் ஆகி விடுகிறது!

எதிர்காலம் என்பதை எண்ணி ஏதோ பாம்புப் புற்றில் கையை விடுவது போன்ற பயந்தாங் கொள்ளித் தனத்தையும் உருவாக்கிக் கொண்டு அச்சத்திலிருந்து வெளிவர முடியாதபடி ஆக்கி மகிழ்ச்சியை விரட்டி அடிக்கிறது. 

'ஜென்' பவுத்தத்தில் ஒரு சொற்றொடர் உண்டு.

"உன் மூச்சில் நீ எப்போதும் வாழ்ந்து கொள்"

மேல் எழுந்த வாரியாகப் படித்தால் வெகுச் சாதாரணமாய் இது தோன்றும்!

ஆனால், நிகழ்காலம் மட்டுமே உனக்கு உரிமையான கைக்குள் இருக்கும் பறவை என்பதை விளக்கவே இது!

மற்றவை பறந்து போனது அல்லது இறந்து போனது; வேறொன்றை எதிர்பார்ப்பது - பறந்து வராதா என்று ஏக்கத்துடன் பார்க்க வைக்கும்!

ஆனால் 'மூச்சில் வாழ்ந்திரு' என்பது நிகழ் காலம் உனக்கு முக்கியம் என்பதைப் புரிய வைக்கும் புத்தாக்க அனுபவ அறிவுரையாகும்!

கடத்துபோன - பழையதை பற்றி இப்போது சிந்தித்து  பயனில்லை - (வேண்டுமானால் அது உரத்திற்குப் பயன்பட முடியும் -  உணவாக எப்போதும் பயன்பட முடியாதே!)

எதிர்காலம் பிறக்காத  - கருவுறாத நிலையில் கற்பனைக் குதிரை சவாரிதானே!

எனவே, நிகழ் காலத்தைக் கெட்டியாகப் பிடித்து, - திமிறிப் போக முடியாமல் காளையின் திமிலைப்பிடித்து அடக்கும் நம் இளைய காளையர்களைப் போல  - நிகழ்காலத்தைச் சிறப்பாகப் பிடித்து மிகுபயன் அனுபவிக்க அதை சாறாகப் பிழிந்து பருகி, பயன் பெற முயற்சியுங்கள்.

மனதின் மூடுபனி - விலக்கல் எப்படி? (1)-(3)

வாழ்வியல் சிந்தனைகள்,

May 18, 2022 • Viduthalai

மனதின் மூடுபனி - விலக்கல் எப்படி? (1)

நமது சாலைகளில் பனி படர்ந்தால் அது எவ்வளவு போக்குவரத்துக்கு இடையூறு என்பது அமெரிக்கா மற்றும் பனி கொட்டும் நாடுகளில் வாழுபவர்களுக்கு நன்கு விளங்கும்!

குளிர்காலத்தில் திடீரென்று பனி கொட்டி வழியை மறைப்பது மட்டுமல்ல, அவரவர் வீட்டுக்கு முன்னே உள்ள கார்ஷெட்டிலிருந்து காரை வெளியே எடுத்து சாலையில் செல்ல ஆயத்தம் செய்யும் பகுதியில் பனி கொட்டி யுள்ளதால் எளிதில் அந்தக் காரை எடுக்க முடியுமா?

பனிக் கட்டிகளை அகற்றிவிட்டு தடத்தை ஒழுங்குபடுத்தித்தான் அதன்பிறகே வீட்டில் (garage-இல்) நிறுத்திய காரை எடுத்து ஓட்டிச் செல்ல முடியும்.

சாலைகளில் போக்குவரத்தை ஒழுங்குபடுத் திட அந்தந்த பகுதி நகராண்மையினர் உப்பு முதலியவைகளைக் கொட்டி, பனியை விலக்கி, வாகனங்களின் போக்குவரத்தை ஒழுங்குபடுத்தி காரை ஓட்டிச் செல்ல உதவி செய்வார்கள்!

நடுவழியில் காரை வேகமாக ஓட்டினால், கார்கள் ஒன்றோடொன்று மோதி, விபத்துகள் ஏற்பட அதிக வாய்ப்புகள் உண்டு! 

எனவேதான் இந்த கொட்டும் பனியை அகற்றிய பிறகே சாலையானது பயண வசதிக்கு வாய்ப்பாக அமையும்.

சாலையில் பனி கொட்டுவதைப் போலவே நமது மனதில் மூடுபனி - அதாவது மன அழுத் தம் - இறுக்கம் அமைந்து விட்டால் நம்மை எளிதில் செயல்படவிடாது. அண்மையில் கடந்த 2 ஆண்டுகளாக கோவிட்-19 கொடுந்தொற்று பல உருவங்களில் மனித குலத்தை வாட்டி, உயிர்ப்பலிகளை வாங்கிக் கொண்டிருக்கும் நிலையில், அச்சத்தாலும், பல இழப்புகளாலும், வாழ்வாதாரத்தை இழந்து வருவதின் - துன்பம் - துயரம் காரணமாகவும் நம்மவர்கள் பலரது மனங்களிலும் படிந்து வரும் மூடுபனியை (Mental Fog) எவ்வாறு விலக்குவது? இது பற்றி சுகாதார - நல்வாழ்வுத் துறையினர் - மருத்து வர்கள் குறிப்பாக மனோதத்துவ மருத்துவ வல்லுநர்கள் ஆய்வு செய்து, அதன் முடிவுகளை - நமக்கு நம்பிக்கையூட்டுவதற்காக கட்டுரை களை பாடம் எடுப்பதுபோல வெளியிட்டு தளரக் கூடாத தன்னம்பிக்கையை விதைக்கிறார்கள்!

அத்தகைய குறிப்புகள் பற்றிய கட்டுரையைப் படித்தேன் - உங்களுடன் பகிர்ந்து கொள்வதில் மகிழ்ச்சியும், மனநிறைவும் அடைகிறேன்.

இந்த மனவெளியில் படிந்துள்ள மன அழுத்த மூடுபனியை எப்படி விலக்குவது என்பது பற்றி மருத்துவ நிபுணர்கள் ஆய்ந்து நேர்த்தியோடு கூறியுள்ள பரிந்துரை போன்ற யோசனைகளை அறிவோமா?

மிக எளிதான வழிமுறைகள்தான் - ஆனால் சோம்பலின்றிக் கடைப்பிடித்துப் பயன்பெற முயற்சிக்க வேண்டும்.

1. நாம் குடிக்கும் தண்ணீர் அளவை அதிகப்படுத்துவது முக்கியம் (தூய்மையான வெந்நீர் - ஆறவைத்தாலும் பரவாயில்லை). ஏனெனில் நீர்ச்சத்து உடலில் லேசாகக் குறைந் தாலும் (even a mild dehydration) நமது சிந்தனை ஆற்றலை சிதைத்து - மூளை - அதன் அவயங்கள் செயல்படுவதால் - எப்போதும் துடிப்புடன் - கவனத்துடன் (Alertness) இருக்கும் மூளைத்திறனை அது பாதிக்கிறதாம்!

மனதில் சில நேரங்களில் தெளிவு இன்மை - நீர்ச்சத்து குறைபாட்டால் ஏற்படக்கூடும்" எனவே போதிய அளவு நீரை அருந்தத் தவறாதீர்கள். குறிப்பாக வயதான முதுகுடிமக்கள், உள்பட்ட இளைஞர், மகளிர் அனைத்து பாலரும் உடம் பின் நீர் தேவையைக் குறைக்காமல் பார்த்துக் கொள்வது நலம் பயப்பதாகும். எப்போதாவது நமக்கு வயிற்றுப் போக்கு ஏற்பட்டால் மருத்து வர்கள் உடனே "அதிகம் தண்ணீர் குடியுங்கள் - உப்பு சத்து உள்பட வெளியேறிவிடும். சமனப்படுத்த ORS Drinks குடிங்க!" என்று கூறுவதைக் நினைவில் கொள்ளுங்கள்!

(தொடரும்)

வாழ்வியல் சிந்தனைகள் -

May 19, 2022 • Viduthalai

மனதின் மூடுபனி - விலக்கல் எப்படி? (2)

நீர் அருந்துதல் மிக அவசியம் என்பதை வலியுறுத்தும் டாக்டர்கள், ஒரு நாளைக்கு 8 கிளாஸ் - 8 அவுன்ஸ் தண்ணீர் கொண்டவை - மொத்தம் (8*8) = 64 அவுன்ஸ் நீர் அருந்துதல் நல்லது என்று அறிவுறுத்துகிறார்கள்.

இப்படிச் செய்யும்போது சிலருக்கு 8 கிளாஸ் தண்ணீர் குடிப்பது சற்று கடினமாக உள்ளது என்று நினைப்பார்களானால், அவர்கள் நீர்ச்சத்துள்ள வெள்ளரிப் பிஞ்சுகள், தர்ப்பூசணி (water melons) போன்ற பழங்களை இதற்குப் பதிலாக சேர்த்து ஈடுசெய்து கொள்ளலாம் என்பதே அந்த அறிவுரை!

2. நமது மூளையில் மூடு பனி போன்ற அழுத்தங்கள் சேர்ந்து சுமையாக நம்மை ஆக்காமல் இருப்பதற்கு நாம் உட்கொள்ளும் உணவும் மிக முக்கியமாகும் என்கிறார்கள்!

தினமும் நாம் உண்ணும் உணவு பற்றியும் சற்று நிதானமாக ஆய்வு செய்து, அதற்கேற்ப மாறுதலைச் செய்து கொள்வதும் அவசியம்.

நாள் முழுவதும் கொழுப்புச் சத்து மிகுந்த உணவை உட்கொள்வது, அதிக சர்க்கரையைத் தரும் உணவு வகைகளை எடுத்துக் கொள்வது நமது ‘மூளையில் மூடுபனி' (மன அழுத்தம்) உருவாவதற்குக் காரணம் ஆகும் என்கிறார் அமெரிக்க டாக்டர் காதர்.

அதற்குப் பதிலாக நாளும் மென்மையான சத்து குறைந்த - குறிப்பாக நார்ச்சத்து நிறைந்த உணவுகளைத் தேடுங்கள்.

காலாவதி தேதிகளைப் பதித்து பேக்கிங் செய்த அடைப்பு உணவுகளைத் தவிர்ப்பது நல்லது. 

நல்ல காய்கறிகள், பழங்கள், தாது வகைகள், பீன்ஸ், ஆரோக்கிய இறைச்சி - மாமிசம் போன்றவைகளைத் தேர்ந்தெடுத்து உண்ணப் பழகுங்கள். இவற்றையும் சேர்த்துக் கொள்ளுங்கள்.

"மனதின் மூடுபனி" ஏற்படாமல் தடுப்பதற்கு, போதிய வைட்டமின்கள் phyto-nutrients  என்ற ஒரு சத்துகளை சேர்த்துத் தரக்கூடிய உணவு வகைகள் தேவை - இரும்பு தாதுச் சத்தினை - பெரும் சத்துகளைத் தரும் macro-nutrients  போன்ற உணவு வகையினை நாம் எடுத்தால், அவை நமக்குப் பெரிதும் உதவக்கூடும்.

பல வேளைகளில் சாப்பாட்டைத் தவிர்ப்பது (எடையைக் குறைப்பது என்ற நோக்கிலோ அல்லது வேறு சில காரணங்களினாலோ) செய்தால் நம் மூளை சரிவர சிந்திக்கும் தன்மையும், கவன முறையும் பாதிக்கப்படக்கூடும். இதனால் நமக்கு உடல் இயக்க சக்தி வெகுவாகக் குறைந்து விடுவதால் (Low Energy) மூடுபனி கைக்கூடும்!

"காலைச் சிற்றுண்டியைத் தவிர்க்கக்கூடாது; 5 மணி நேரத்திற்கு ஒரு முறை உணவு எடுத்துக் கொள்ளுதல், பகலில் பெரிதும் போதிய சக்தியைத் தரும்" என்கிறார் டாக்டர் லோரன்சு!

"இதனைக் கடைப்பிடித்த எனது வாடிக்கை யாளர்கள் போதிய சக்தியும், தெளிவான சிந்தனை - செயலாக்கத்துடன் நாளும் இருக் கிறார்கள்" என்கிறார்.

3. உடற்பயிற்சியும் முக்கியமாகும்!

உடலுக்கு மட்டும் அதனால் பலம் பெறு கிறோம் என்றுதான் நம்மில் பலரும் கருதுகிறோம். அதே அளவுக்கு உடற்பயிற்சி மனதிற்கும் ஊக்கத்தையும், உற்சாகத்தையும், பலத்தையும் அளிக்கிறது என்பதை ஏனோ மறந்து விடுகிறோம்.

(இப்படி எல்லா வயதுக்கும், அவரவர் உடலுக்கும் ஏற்ற உடற்பயிற்சிகளை மருத்துவர் ஆலோசனைக் கேட்டு, பழக்கப்படுத்திக் கொள்ளல் முக்கியம். இளமையானவர்கள் கடுமையான பயிற்சிகளைக் கூட செய்யலாம். ஆனால் அதை முதுமையானவர்கள் செய்தால் எதிர் விளைவு தானே ஏற்படும். பொதுவாக 20 மணித் துளிகள் முதல் 30 மணித் துளிகள் வாரம் குறையாது 5 நாட்கள் செய்தாலே முது குடிமக்களுக்குப் போதுமானதாகும்).

மூச்சுப் பயிற்சிகள், உள்மூச்சை இழுத்து வெளியே விடல் (Aerobic exercise ) போன் றவை நமது சுவாசப்பைகளை நன்கு விரிவடையச் செய்வதுடன், மூளைக்கும் ரத்த ஓட்டம் செல்வ தற்கும், புதிய சக்தியைப் பெறுவதற்கும் உறு துணையாக இருக்கிறது; அதனால் நினைவு ஆற்றலும், கற்கும் திறனும் பெருகவும் அது வாய்ப்பை ஏற்படுத்தி மூளையில் மூடுபனியை அண்டவிடாமல் விரட்டுகிறது.

(தொடரும்)

(திருத்தம்

நேற்றைய (18.5.2022) "வாழ்வியல்  சிந் தனைகள்" கட்டுரை (1)இல் கடைசி பத்தியில், "மனதில் சில நேரங்களில் தெளிவற்ற தன்மை (Mental Clarity) இன்மை ஏற்படலாம்" என்பதற்குப் பதிலாக "மனதில் சில நேரங்களில் தெளிவு இன்மை - நீர்ச்சத்து குறைபாட்டால் ஏற்படக்கூடும்" என்று திருத்திப் படிக்கவும்.

தவறுக்கு வருந்துகிறோம்.

- ஆ-ர்) -திருத்தப்பட்டது

வாழ்வியல் சிந்தனைகள் - கி.வீரமணி

May 20, 2022 • Viduthalai

 மனதின் மூடுபனி - விலக்கல் எப்படி? (3)

4. தூக்கமும் - மிக முக்கிய தேவை - மூளையில் சேரும் மூடுபனியை விரட்டிட!

போதிய தண்ணீர் குடித்தல், உடற்பயிற்சி, ஊட்டச் சத்து நிறைந்த உணவு எவ்வளவு முக்கியமோ - மனதின் இறுக்கத்தின் வடிவமான மூளையின் மூடுபனியை விரட்டிட நல்ல உறக்கமும் இன்றியமையா தேவை என்கின்றனர் மருத்துவ நிபுணர்கள்.

போதிய தூக்கமின்மை என்பது நமது சிந்திக்கும் திறனை வெகுவாகப் பாதிக்கிறது.

உணவு செரிமானம் இன்மை உள்பட பல தொல்லைகளும் தூக்கமின்மையின் உடன் பிறப்புகளாகும்!

டாக்டர் போ. சரவ்ஹிசு என்ற தூக்க நிபுணர் கூறுகிறார்:  "தூக்கமின்மை நமது எண்ண ஓட்டத் தினை (SleepingOcean.com) வெகுவாகக் குறைக்கிறது. ஒரு விஷயத்தைப் பற்றிய நமது கருத்துவெளியிடுவதற்கான  (Reaction) நேரத் தையும்கூட வெகுவாகப் பாதிக்கிறது. 

அத்துடன் தூக்கக் குறைவின் காரணமாக நினைவு ஆற்றலையும் அது வெகுவாகக் குறைக் கிற தீமையும் உண்டு. மூளையின் செல்களும்கூட ஒன்றோடு ஒன்று தகவல் பரிமாறிக் கொள்வதும் இதனால் வெகுவாகப் பாதிக்கப்படும்" என்கிறார்!

டாக்டர் ஹிசு "ஒரு தூக்க அட்டவணையை உருவாக்கிக் கொள்ளுங்கள். அதைவிடாமல்  பின்பற்றிடத் தவறாதீர்கள். அதாவது குறிப்பிட்ட நேரத்திற்குத் தூங்கச் சென்று, குறிப்பிட்ட நேரத் தில் விழிப்புக் கொள்ளும் அந்த அட்டவணைக்கு ஆளானால் நமது உடல் கடிகாரமும் அதனை வெகுவாக முறைப்படுத்திடவும் உதவும் - வார விடுமுறை நாள்களாக இருந்த போதிலும்கூட அந்த திட்டத்தினை மாற்றாமல் கடைப்பிடிப்பது, நமது மூளையில் மூடுபனி சேராமலிருக்கப் பெரிதும் உதவிடக் கூடும்!

நாளும் இப்படி குறிப்பிட்ட நேரத்தில் தூங்கி, குறிப்பிட்ட நேரத்தில் விழிக்கும் பழக்கம் இன் னொரு கோணத்திலும் மிகவும் வரவேற்கத்தக்க தாகும். மூளைக்கு நல்ல ஓய்வு; உடலுக்கும் நல்ல ஓய்வு தருவதாக அது அமையக் கூடும். அதுவும் ஒருவகை இளைப்பாறுதல் (Relaxation) தானே! அப்படி ஒரு தூக்கப் பழக்கத்தை ஏற்படுத்தினால் எளிதில் தூக்கமும், எளிதான விழிப்பும், அதே நேரத்தில் ஆழ்ந்த உறக்கமும், அதன்மூலம் ஏற்படும் அருமையான வாய்ப்பும் ஏற்படக் கூடும்!

இப்படிப்பட்ட பழக்கத்தால் வளர்ந்த மனத் தெளிவும், மாசில்லா சிந்தனைப் பழக்கமும் வரும் வாய்ப்பும் ஏற்படக் கூடும்!

தூக்க நேரத்திற்குமுன் காபி குடிப்பதைக் கைவிடுங்கள்.

தூங்குவதற்கு ஓரிரு மணிக்கு முன் திரைப் படங்கள், தொலைக்காட்சி பார்த்தல் இவை களைத் தவிர்ப்பது அவசியம் (ஆனால் நம்மில் பலரும் இந்த விதியைமீறும் "குற்றவாளிகளே!").

தூங்கப் போகுமுன் குளித்தல் - வெது வெதுப்பான வெந்நீரில் அல்லது சூடான தேநீர் ஒரு குவளை குடித்தல்  முதலிய பழக்கம் இருந்தால் அதுவே உங்கள் மூளைக்கு ஒரு 'சிக்னலை' அனுப்பும். தூக்கம் நம் கண்களைத் தழுவும் நேரம்  வர இருக்கிறது என்று அறிவிப்பது போன்று அவை உதவும்.

இரவு உணவு எப்போதும் லகுவான, மென்மையான- எளிதில் செரிமானம் உள்ள உணவாக இருப்பின் நல்லது.

உறங்கச் செல்வதற்கு சுமார் மூன்று மணி நேரத்திற்கு முன் - இரவு உணவை சாப்பிட்டு - படித்தல் மற்ற சில இளைப்பாறும் ஓய்வு - மனச்சலனங்கள் அற்ற வகையான புத்தகப் படிப்பு - இவை ஆழ் உறக்கத்திற்குப் பெரிதும் துணை செய்யும்.

கூடுமான வரை தூங்கும் படுக்கை அறை களில் தொலைக்காட்சிப் பெட்டி இல்லாமல் பார்த்துக் கொண்டு படுக்கைக்குப் பக்கத்தில் புத்தகங்கள் வைத்து குறிப்பிட்ட நேரம் படித்து உறங்கும் பழக்கம் வெகுவான மனதின் மூடுபனி யால் மூளை உறையாமல் இருக்கப் பெரிதும் உதவும். 

மன இறுக்கத்தை விரட்டி, ஒருவரை உற்சாகத் துடன் கடமையாற்ற ஆயத்தமாம் - இதன் மூலம்."

புரட்சிக் கவிஞர் - சில நினைவுகளும் நிகழ்வுகளும் (1)

வாழ்வியல் சிந்தனைகள்- கி.வீரமணி

   April 29, 2022 • Viduthalai

 புரட்சிக் கவிஞர் - சில நினைவுகளும் நிகழ்வுகளும் (1)

புரட்சிக் கவிஞர் என்ற சிங்கத்தை சந்தித்ததும், நான் பழகியதும், அவரிடம் கற்றவைகளும், பெற்றவைகளும்  ஏராளம்! ஏராளம்!!

அவை யான் பெற்ற பெரும்பேறுகளில் முக்கிய மானவை.

வேறு எவருக்கும் கிடைக்காத எனது எளிய வாழ்வின் பேறுகளில் முக்கியமானது.

10 வயதில் அறிஞர் அண்ணாவை

அறிவு ஆசான் தந்தை பெரியாரை

நமது ஒப்பற்ற புரட்சிக் கவிஞரை

அஞ்சா நெஞ்சன் தளபதி பட்டுக்கோட்டை அழகிரிசாமி 

ஆகியோரைப் பார்த்தது, அவர்கள் என்னை ஊக்கப்படுத்தி, பால பாடத்தை கற்றுக் கொடுத்தது என்னே அரிய, பெரிய வாய்ப்பு! எவருக்கும் இப்படி ஒரு பெருத்த பெரும் வாய்ப்பு கிட்டியிருக்குமா என்பது அய்யம்தான்!

அதற்கு முழு முதற் காரணமான எனது கொள்கை ஆசான் மானமிகு ஆ.திராவிடமணி அவர்களுக்கு எனது வணக்கம் கலந்த கடன்பட்ட நன்றிகள்!

புரட்சிக் கவிஞரை - புதுச்சேரி மக்கள் - உள்ளூரில் அனைவருமே 'வாத்தியார்' என்று தான் அழைப்பர்.

அவரை நான் 13 வயது சிறுவனாக இருந்த போது புதுச்சேரியில் எனது ஆசான் ஆ. திராவிடமணியோடு, பிறகு எனது மூத்த அண்ணன் திராவிட இயக்க கொள்கைச் செம்மல் கடலூர் கோவிந்தராசன் அவர்களுடன், புதுவை சகுந்தலா சாயத்தொழிற்சாலை அதிபரும், புதுச்சேரி திராவிடர் கழகத் தலைவருமான பொன். இராமலிங்கம் அவர்களுடன் சென்று சந்தித்தபோது, அவர் என்னை வியந்து கூர்ந்து கவனித்து உரையாடியதெல்லாம் பின்னாளில்!

முதலில் அந்த 'கவிச் சிங்கத்தை' மிகுந்த அச்சத்துடன் தான் பார்த்தேன்.

புதுச்சேரியில் 'கெப்ளே' தியேட்டரில் நாகை திராவிடர் நடிகர் கழகம் சார்பில் ஆர்.வி. கோபால் ("ராயல்" சோடா பாக்டரி உரிமையாளர்) அவர் களின் உருவாக்கம் - அதன் பிரதான கதாநாயகர் எழுத்தாளர் நமது கலைஞர் - மாணவப் பருவம்  முடிந்த நிலையில் கலைஞர்  - புதுச்சேரியில் நாடகம்  - "போர்வாள்", "தூக்குமேடை".  அதற்கு முதலில் "சாந்தா அல்லது பழனியப்பன்" என்று அவர் எழுதி நடித்த நாடகங்கள் சுமார் 30 நாள் களுக்கு மேல் நடைபெற்றன. (1946 ஆக இருக்கும்).

அப்போது சேலத்தில் திராவிடர் கழகப் பெயர் மாற்றத்திற்குப்பின் புதுச்சேரி திராவிடர் கழகம் உதயமாகி,  ஒதியஞ் சாலைத் திடலில்  - ஹாலில் பந்தலிட்டு புதுச்சேரி திராவிடர் கழக மாநாடு - தந்தை பெரியார், அறிஞர் அண்ணா, தளபதி அழகிரிசாமி போன்ற தலைவர்கள் வருகை தந்தனர்.

முதல் நாள் மாலையில்  மாநாடு சென்றபோது, கலைஞர் நாடகத்தில் வரும் சுயமரியாதை திருமண   (சீன்) காட்சி ஒன்று. அதில் முழுக்கால் சட்டை, ஜிப்பாவுடன் சென்ற என்னை கலைஞர் அழைத்து நாடகத்திலேயே அத்திருமணத் தலைவராக அறிவித்து, நானும் சில நிமிடங்கள் பேசி கைதட்டல் வாங்கி திருமணம் நடத்தி வைத்த காட்சியும் ஒன்று.

திரைக் கொட்டகை மேடையின் பின்புறம் நாடகத்தை ரசித்தவர் தளபதி அழகிரி - என்னை முதுகில் தட்டிக் கொடுத்தார்.

அடுத்த நாள்தான் காலை ஓதியஞ் சாலைத் திடலில் தந்தை பெரியார், அண்ணா உள்பட தலைவர்கள் கலந்து கொண்ட மாநாடு, கவிஞர் புதுவை சிவம், பொன். ராமலிங்கம், புதுவை திராவிடர் கழக அந்நாள் தலைவர் காக்கேயர் - துப்ளே தெரு கடைவீதியில் அப்போது பெரிய, கடை அதிபர் - பிரபலமானவர், நமது 'வாத்தியார்' புரட்சிக்கவிஞர் உட்பட பலர்.

மாநாட்டிற்கு எனது ஆசிரியர், அண்ணா சகிதம் உள்ளே போவதற்குமுன் சற்று தொலைவில் வந்த கலைஞரை துரத்திச் சென்று தாக்குகின்றனர் - தள்ளி நின்ற சிறுவனான எனக்கு ஒன்றும் புரியவில்லை - "நீ மாநாட்டிற்குள் செல் - உள்ளே போகலாம்" என்றனர். சில நிகழ்வுகளுக்கு பின் காலிகளின் கலாட்டா, கலவரம் - ஆபாசப் பேச்சுகள் மழைபோல கொட்ட, பிரெஞ்சுப் போலீஸ் சரியான பாதுகாப்பை தரவில்லை. இதெல்லாம் ஏதோ திரைக்காட்சிபோல ...

தந்தை பெரியார், நமது தாய்மார்களை, பெண்களை பந்தலிலிருந்து பத்திரமாக வெளியேற அறிவுரை கூறுகிறார். மாநாடு அரை நாளிலேயே முற்பகல் முடியும் இக்கட்டான நிலை.

வெளியே நின்று கொண்டிருந்தவர்கள் பாரதிதாசனை ஒரு கை ரிக்ஷாவில் ஏற்றிவிட - துணிவுடன் திரும்புகிறார். சிலர் மறித்து நின்று அவர்மீது செருப்பை வீசி ஓடி ஒளிய ரிக்ஷாவை நிறுத்தச் சொல்லி, எழுந்து நின்று ஒரு சிங்க முக சீற்றப் பார்வையுடன் பார்க்கிறார். தூரத்தில் கண்ட அக்காட்சி என்னுள் பதிந்தது இன்று வரை அழியவே இல்லை. அதுதான் முதலில் அவரைக் கண்டு வியந்த இந்த சிறுவன் கற்ற அஞ்சாமைப் பாடம்.

(வளரும்)

முதுமை சுகமா? சுமையா?

   April 12, 2022 • Viduthalai

வயது ஏறுவது தவிர்க்க முடியாத இயற்கையின் விளைவு. முதுமை என்பதைக் கண்டு அஞ்சவோ, ஆயாசப் படவோ கூடாது.

மனதை இளமையாக வைத் திருந்தால் மட்டும் போதாது நண்பர்களே.

உடலில் தவிர்க்க இயலாது வரும் முதுமைக்கான நோய்களுக்கு போதிய தடுப்பு முன்னெச்சரிக்கைகளையும் முதுமையான நண்பர்கள் கடைப்பிடிக்கத் தவறக்கூடாது.

முதுமையின் விளைவாக வரும் நோய்கள்பற்றி மிகவும் கவனமாக இருக்க வேண்டும். தடுத்தும் மீறி ஏற்பட்டால், அதிலிருந்து விடுபடவோ, அல்லது அதன் தீய விளைவுகளைப் புறந்தள்ளிட முதியவர்கள் கற்றலும் அதன்வழி நிற்றலும் மிக மிக அவசியம்.

(1) மறதிநோய் ( (Dementia) 

(2) பார்க்கின்ஸன் என்ற உதறுவாதம்

(3) சிறுநீர் அடக்க முடியாமை (Urinary incontinence)

(4) அடிக்கடி கீழே விழுந்து விடுதல்  (Fall)

(5) எலும்பு தேய்மானம்

(6) சிறுநீர் வழி அடைப்புச் சதைவலி - புரோஸ்டேட் நோய்  (Prostate disease)

இதுதவிர இரத்த அழுத்தம்  (B.P.) சர்க்கரை நோய், இதய நோய், மத்திய வயதில் ஏற்பட்டு முதுமையில் தொடர்வது என்ற அல்லல் - சிற்சில நேரங்களில் தலை சுற்றல் (Vertigo)

நோயற்ற வாழ்வே குறைவற்ற செல்வம் என்றாலும்கூட நோயுற்ற மனிதர்களை தகுந்த சிகிச்சை கொடுத்து காப்பாற்ற வேண்டியது மிக முக்கியம்.

முதுமையிலும் இயன்றவரை நடப்பதை நிறுத்தி விடாமல், வீட்டுக்குள்ளேயே சிறிது நேரமாவது நடந்து தினமும் உடற்பயிற்சிபோல செய்தல், நமது உடலைப் பாதுகாக்க மிக எளிமையான முறை ஆகும்.

பல முதியவர்கள் பிள்ளைகளோ, குடும்பத்த வர்களோ, தங்களை நன்கு கவனிக்காமல் புறக்கணிப்பதுபோல உணர்வார்கள்.

ஒரு கிராமத்து முதியவர் சொன்னார் ஒரு பழமொழி - மிகப் பொருத்தமாக   - "நடைமுடமானால் கிடை சேர நேரிடும்"

புற்று நோய் போன்ற சில நோய்கள் மறைந்து இருந்து தாக்கி, உயிர்களைப் பறிக்கும்  ஆபத்து இருப்பதால், முதியவர்கள் கட்டாயம் உடற்பரிசோதனையை முதுமை நிலைக்கு ஏற்ப, ஒரு ஆண்டுக்கு ஒருமுறையோ, 6 மாதங்களுக்கு ஒரு தடவையோ செய்து கொள்ளுவது மிகவும் இன்றியமையாதது (ஸ்கேன் செய்து பார்த்தல்  - முக்கியமாக நமது உடல்பற்றி முழுமையாக தெரிந்து கொள்ளலாம்).

மருத்துவமும், மின்னணுவியலும் இணைந் ததால் தான் இந்த ஸ்கேன் கருவிகள்  கிடைத்தன - பயோமெடிக்கல் படிப்பும் உண்டு.

ரத்தப் பரிசோதனை, சிறுநீர் பரிசோதனை போன்றவைகளையும் அத்துடன் இணைத்து ஒருங்கிணைந்த உடல் ஆய்வு மூலம் நமக்கு அருமையான அரிய உடல்நலம்பற்றிய உண்மைகள்   தெரிய வாய்ப்புண்டு.

அரசின் ஆயுள் காப்பீடு அல்லது வேறு தனியார் ஆயுள் காப்பீடு திட்டத்தினையும் பயன்படுத்தினால், செலவுகளை ஈடுகட்ட முடியும்.

எல்லாவற்றிற்கும் மேலாக முதியவர்களிடம் கருணையும், அன்பும், பாசமும் காட்ட இளைய தலைமுறையினர் தவறக் கூடாது.

அவர்களை இன்று இளைஞர்கள் சரிவர மரியாதையுடன் நடத்தத் தவறினால், நாளை அதே கதி - இவர்கள் முதியவர்களாகும்போது ஏற்படும் என்பதை மறக்கவே கூடாது! அதே நேரத்தில் முதியவர்களும் இளைஞர்களைப் புரிந்து, உணர்ந்து நடந்து கொள்ளவும் தவறக் கூடாது.

இவர்தான் அன்னை ஈ.வெ.ரா. மணியம்மையார்! (9)-(11)

வாழ்வியல் சிந்தனைகள் - கி.வீரமணி

March 26, 2022 • Viduthalai

 இவர்தான் அன்னை ஈ.வெ.ரா. மணியம்மையார்! (9)

அம்மா அவர்கள் உடல்நலக்குறைவுடன் சென்னை, பொது மருத்துவமனையில் வழக்கமாக அவர் சிகிச்சை பெறும் தனிவார்டில் இருந்தபோது, திருச்சி நாகம்மை குழந்தைகள் இல்லத்தில் இருந்த ஒரு பெண்ணை (சுமார் 14 வயதிருக்கும்) காண வில்லை என்று அலைந்து திரிந்து பார்த்து, அப்போது அங்கே பொறுப்பேற்றிருந்த பெரியார் மாளிகை நிர்வாகி அவர்கள் இதனை ஓரிரு நாள் பொறுத்தே என்னிடம் சொன்னார். அம்மாவின் இந்த உடல் நிலையில், அவரிடம் சொல்வதா, சொல்லாமல் இருப்பதா என்ற குழப்பம்  - திருச்சியில் இருப்பவர்களுக்கும் இங்கே இருந்த சில நண்பர்களுக்கும் இருந்தது. 

நான் நன்கு யோசித்த பிறகு, அம்மாவிடம் இதை மறைக்கக் கூடாது; இதை சாதாரணமாக அம்மா எடுத்துக் கொள்ளமாட்டார். மிகவும் வேதனைப்படுவார். நாம் அனைவருமே அதற்கு பொறுப்பேற்கவேண்டிய “குற்ற வாளிகள்” ஆகிவிடுவோம் - என்று பக்குவமாக இதனை அம்மாவிடம் தெரிவித்துவிடலாம் என்று முடிவு எடுத்து பக்குவமாக தெரிவிக்க - அம்மா மிகவும் வருத்தமும், கோபமும், சோகமும் அடைந்தார்.

"ஏன் அவர் (திருச்சியில் இருக்கிறவர்) என்ன செய்தார்? உடனடியாக தகவல்களைத் திரட்டி ஓரிரு நாட்களுக்குள் எனக்குத் தெரிவித்து, மேல் நடவடிக்கைக்கான ஆலோசனை நடத்த வேண்டும்" என்றார். டாக்டரிடம் அனுமதி பெற்று திடலுக்கே வந்து தங்கினார்.

அடுத்த நாள் ஒரு தகவல் திருச்சியிலிருந்து கிடைத்தது. இல்லத்திலிருந்து வெளியே சென்ற அந்தப்  பெண்ணை சிலர் அழைத்துச் சென்று அங்கே ஒருவர்  - அதிகாரி - வீட்டில் வேலை செய்ய விட்டதாக கசிந்தது அத்தகவல்.

உடனே அம்மா பல பேர்களை திருச்சியில் தொலை பேசி மூலம் தொடர்புகொண்டு முழு விவரங்களைத் திரட்டச் சொன்னார் - அந்த உடல் நிலையிலும்கூட!

இரண்டாம் நாள் அங்கிருந்த ஒரு அரசு அதிகாரியின் வீட்டிலிருந்து சென்னையில் உள்ள அவரது நண்பராகவோ, உறவினராகவோ உள்ள ஒரு மூத்த அய்.ஏ.எஸ். அதிகாரி வீட்டிற்கு இந்தப் பெண்ணை அழைத்துச் சென்று விட்டதாக முன்பு தகவல் சொன்னவர்கள் கூடுதல் தகவலாக இதனைச் சொன்னார்கள்!

தமிழ்நாடு அரசின் முக்கிய மூத்த அய்.ஏ.எஸ்சின் உதவியாளர் வீட்டில் அண்ணா நகரில் பணியில்  இருக்கிறார் என்ற செய்தி தெரிந்தவுடன், அம்மா என்னையும் நிர்வாகி சம்பந்தம் அவர்களையும் அழைத்து, இங்கே போலீஸ் கமிஷனர் அலுவ லகத்தில் ஒரு பிராது கொடுக்கச் சொல்லியதோடு, வழக்குரைஞர்களை - சென்னையில் இருப்பவர் களையும் உடனடியாக அழைத்து வரும்படி எங்களுக்கு ஆணையிட்டார் - கோபம் குறையாத நிலையில்! உடனே ஏற்பாடு செய்தோம். தமிழ்நாடு அரசில் அந்த அதிகாரி மூத்த அய்.ஏ.எஸ். அதிகாரி என்பதால், சென்னை நகர போலீஸ் அதிகாரிகளின் நடவடிக்கை மெத்தனமாக நத்தை வேகத்தில் நகர்ந்த நிலையிலேயே இருந்தது.

இதை நாங்கள் புரிந்து கொண்டோம் - அம்மா நாளும் எங்களைத் துளைத்துக் கேள்வி மேல் கேள்வி கேட்டும் பரபரப்புக் குறையாமல் இருந்தார்.

அந்தப் பெண் குழந்தையை கண்டுபிடித்தாக வேண்டும் - திரும்பக் கொண்டுவந்து குழந்தைகள் இல்லத்தில் சேர்க்க வேண்டும் என்பதைவிட, அந்த நிகழ்வு அம்மாவுக்கு அதிக கவலை, மன உளச்சலை ஏற்படுத்தி, அவரது உடல்நிலையை மோசமாக்கி விடக் கூடாதே என்ற 'இரட்டைக் கவலையில் பூட்டப்பட்டவர்களானோம் - நாங்கள்!'

அம்மாவிடம் நெருங்க அச்சப்பட்டு - சற்று ஒதுங்கி அந்த சில நாட்கள் நடந்தோம்.

அம்மா, வழக்குரைஞர்களிடம் சட்ட நட வடிக்கை மேற்கொள்ள வற்புறுத்தினார்கள்.

பிணீதீமீணீs சிஷீக்ஷீஜீus என்ற ‘ஆட்கொணர்வு மனு' வழக்கு 'ரிட்' ஒன்றை அம்மாவை மனுதாரராக்கி சென்னை உயர்நீதிமன்றத்தில் நமது வழக்குரை ஞர்கள் போட்டார்கள்.

அப்போது பொறுப்புத் தலைமை நீதிபதி (குஜராத்திற்கு செல்லும் முன்பு) இருந்த ஜஸ்டீஸ் பி.ஆர்.கோகுல கிருஷ்ணன், ஜஸ்டீஸ் ஏ.வரதராசன் ஆகியோர் அமர்வு உடன் விசாரித்து காவல் துறையினருக்கு கடும் ஆணை வழங்கி "இரண்டொரு நாளில் கண்டிப்பாக நேரில் அப் பெண் குழந்தையை எங்கள் முன் - இந்த உயர்நீதி மன்றத்தில் கொண்டு வந்து நிறுத்த வேண்டும்" என்று தீர்ப்புரை - ஆணை வழங்கினர்.

காவல்துறையினர் உடனடியாக அங்கே சென்று அந்தப் பெண்ணை கொணர்ந்து சேர்த்து விட்டார்கள். அந்தப் பெண் அழுது புலம்பியது அம்மாவை நேரில் பார்த்தபோது - அம்மாவும் கண்ணீருடன் அது திரும்பி வந்தது குறித்து நிம்மதிப் பெருமூச்சு விட்டார். நாங்களும் தப்பித்தோம்!

அதற்குப் பிறகு எனது தலைமையில் திருமண மாகி, இரண்டு பெண் குழந்தைகள் நன்கு படித்து தற்போது பெங்களூரில் ‘செட்டிலாகி' இருக்கிறார்கள்! பாசம் மாறாமல் எங்களிடமும் இல்லக் காப்பாளர் தங்காத்தாளிடமும் தொடர்புடன் இருக்கிறார்!

சில மாதங்களில் அம்மா மறைந்த நிலையில், திடலுக்கு வந்து அந்த இரண்டு மாண்பமை நீதிபதிகளும் - அம்மாவிற்கு மலர் வளையம் வைத்தபோது, அந்தக் குழந்தையை ஆட் கொணர்வில் கொண்டு வந்து அம்மாவுக்கு நிம்மதியை தங்கள் ஆணை மூலம் தர முடிந்தது - பற்றிக் கூறிக்கொண்டே இரங்கலையும் ஆறுதலையும் எங்களிடம் கூறினார்கள்!

பெற்றால்தான் பிள்ளையா? - இப்படி துடிதுடித்து காத்த தாய் அல்லவா அவர்!

- புரிகிறதல்லவா, இப்போது அன்னையின் பாசம் எப்படி அளவற்றது என்பது!

வாழ்வியல் சிந்தனைகள் -இவர்தான் அன்னை ஈ.வெ.ரா. மணியம்மையார்! (6)-(8)

வாழ்வியல் சிந்தனைகள் -இவர்தான் அன்னை ஈ.வெ.ரா. மணியம்மையார்! (6)

March 23, 2022 • Viduthalai

தனது ரத்த உறவுகளில் யாரும் கொள்கை பூர்வ இயக்க உணர்வு கொண்டு, இயக்கத்தில் இல்லாதவர்கள், என்ற நிலையில்கூட, தந்தை பெரியார் அவர்கள், தனது அறக்கட்டளையில் தனக்குப் பிறகு அன்னையார் அதனை நடத்தும் போது அவருக்கு உறுதுணையாக இருக்க வேண்டும் என்ற பாதுகாப்பு - நல்லெண்ணக் கண்ணோட்டமாக அம்மாவின் தம்பி ஒருவரை யும் உறுப்பினராக நியமித்தார். அவருக்கு அய்யாவே அவரது உறவு வழியிலே ஒருவரை யும் திருமணமும் செய்து வைத்தார்.

அய்யா டிரஸ்ட் உறுப்பினராக அவரைப் போடுவதை அம்மாவுக்குக்கூட முதலில் சொல்ல வில்லை, பிறகு சில மாதங்கள் கழித்துதான் அய்யா அம்மாவிடம் மினிட் புத்தகத்தில் - நடவடிக்கைகளுக்கான கையொப்பம் வாங்கும் படி சொன்னபோது; அவரது தம்பி பெயரைப் பார்த்துவிட்டு அவர் மகிழ்ச்சி அடையவில்லை; மாறாக, அய்யாவிடம் “அவனை ஏன் போட்டீர் கள்?” என்று கேட்டுள்ளார்; “உங்களுக்குத் துணையாய் - உதவியாய் இருப்பார்” என்று கருதியே போட்டிருக்கிறேன் என்று சொன்னார் அய்யா.

உடனே அம்மா அவர் கூறியதில் சற்றும் தயங்காமல், “அவன் துணையாய் இருக்க வேண் டாம். தொல்லை கொடுக்காமல் இருந்தாலே நல்லது. அதில் எனக்கு உடன்பாடில்லை” - என்று அய்யாவிடம் சொன்னதை எங்களிடம் பிறகு ஒரு நாள் சொன்னார் - சில புகாருக்குரியவராக அவர் நடந்து கொண்டார் - அய்யா மறைவுக்குப் பின் - அம்மா கணித்தது சரியாயிற்று.

அம்மா கணித்தது எதுவும் தவறாகப் போகவில்லை. அம்மா மறைவுக்குப் பின்னரும் நான் அவரை நீக்கிடவில்லை - சற்று எச்சரிக்கை யாகவே இருந்தேன். காரணம் அவரும் திடலி லேயே இருந்தார் அவரையும் வெளியேற்ற வில்லை.

அன்னையார் தொலைநோக்கு சரியானது என்பதை அவரது நடத்தை அம்மா வாழ்ந்த போதும் சரி, பிறகும் சரி இயக்க நடவடிக்கை களுக்குப் பெருத்த அவலமாகவே இருந்தது. அது பற்றி விவரிக்க விரும்பவில்லை.

அன்னையாருக்கு ஒரு தங்கை, இரண்டு தம்பிகள், தங்கை பெங்களூருவில் பெரும் குடும்பத்தில் திருமணமாகி அவருக்கு இரண்டு பையன்கள், இரண்டு பெண்கள். இராணுவத்தில் பணியாற்றி, பெங்களூருவில் நிரம்ப சொத்துப் படைத்து பிறகு சற்று வாய்ப்புக்குறைந்த வர்களானவர்கள். அதிக தொடர்பு அம்மா வைத்துக் கொள்ள மாட்டார்.

தம்பிகள் இருவரில் ஒருவர் திடலில் இருந்த வருக்கு மூத்தவர். அவர், இராணுவத்திலிருந்து ஓய்வு பெற்று ஒரு கம்பெனியில் பணிபுரிந்தவர் - ஒழுக்கமானவர். எப்போதாவது அம்மாவை வந்து பார்த்துவிட்டுப் போவார். அவருக்கு திருச்சியில் பெண் பார்த்து பெரியார் தலைமை யில் திருமணம். பிள்ளைகள் உண்டு. அம்மாவின் தங்கை (கமலா அம்மாள்). தங்கையின் பெண் பிள்ளையில் ஒன்று அம்மா உடல் நலம் குறைந்தவுடன் கடைசி கட்டத்தில் உதவியாக இருந்தவர்.

அம்மாவின் அன்னையார் (திருமதி பத்மாவதி) உடல் நலம் குன்றி, மீரான் சாயபு தெரு வீட்டில் ஒரு அறையில் கடைசி வரை இருந்தவர். அவரை அம்மா கவனித்து வந்தார்!

அமைப்பின் சொத்தில் அந்த உறவுகள் உரிமை கொண்டாட முடியாமல் செய்தாலும், அம்மா மனிதநேயத்துடனே அவர்களிடம் பழகினார். அம்மாவின் அன்னையார் தம் விருப்பப்படி அவர்களது நகைகளில் சிலவற்றை அம்மாவுக்குத் தந்தார். அவர் அணியாமல் வைத்திருந்து என்னிடம் “மூத்த தம்பி, தங்கை இவர்களின் குடும்பத்தில் இந்தந்த பிள்ளை களுக்கு என்று எனக்குப் பிறகு நீ அவர்களை அழைத்து இந்தக் குடும்ப நகைகளை அவர்க ளிடம் ஒப்படைத்துவிடு” என்றார். அவை பெரும் அளவில் இல்லை; ஓர் அளவுக்குள்ளதையும் என்னிடம் குறிப்பிட்டார்கள்.

“அம்மா, நீங்களே பெயர், நகை விவரம், அளவு எல்லாவற்றையும் ஒவ்வொரு சிறு துண்டுத் தாளில் உங்கள் கையெழுத்துடன் ஒவ்வொருவர் பெயரிலும் எழுதிக் கொடுங்கள்” என்று கேட்டவுடன் எழுதியே தந்தார்.

அந்த நகைகளை அன்னையார் மறைந்த சில வாரங்களில் அவர்களை வரவழைத்து, அவர்க ளிடம் அம்மா கைப்பட எழுதிய பெயர், விவரம் எல்லாம் தந்தேன். பெரியார் திடலில் குடியிருந்த நிர்வாகி என்.எஸ்.சம்பந்தம் துணைவியார் திருமதி கமலா, பகுத்தறிவாளர் கழகத் தலைவர் பண்டரிநாதன் (அய்.ஏ.எஸ். ஓய்வு) இருவர் முன்னிலையில் சாட்சியத்தோடு அவரவர்க ளுக்கு ஒப்படைத்தேன். அவர்களும் மகிழ்ச்சியு டன் பெற்றுக் கொண்டார்கள்.

தன்னுடன் இறுதி வரை உதவிக்கு இருந்த தங்கை மகள் சுனிதி என்ற பெண் பெயரில் 25,000 ரூபாய் அம்மா ஆர்.டி. போட்டிருந்ததை இன்கம் டாக்ஸ் துறையினர் அம்மா ஏதோ பினாமி பெயரில் போட்டிருப்பதாகத் தவறாகக் கருதி அதையும் எடுத்துச் சென்றனர். இது நெருக்கடி நிலை - மிசா காலத்தால்.

மிசாவில் விடுதலையாகி நான் வந்த பிறகு இதுபற்றி அம்மா என்னிடம் சொன்னார்கள். கட்டடங்களை ‘அட்டாச் செய்ததோடு’ அறக் கட்டளை கட்டட வாடகைகளைக் கூட வருமான வரி பாக்கிக்காக என்று அட்டாச் செய்து முடக்கினர்.

“இதுபற்றி உரிய வருமானவரித் துறை அதிகாரியைச் சந்தித்து, நம் பள்ளிகள், விடுதலை, மற்றவற்றை எப்படி நடத்துவது என்பது பற்றிப் பேசி இதற்கு ஒரு முடிவு காண உரிய அதிகாரிகளை சந்தித்து வருகிறேன்” என்று அம்மா விரும்பியடியே சென்றேன். அவர் ஒரு உயர்ஜாதி அதிகாரி. அவருடன் பல மணி நேரம் பேசி “ஒரு குறிப்பிட்ட தொகையினை மாதா மாதம் வருமான வரிக்காக கட்டுவோம். மற்ற நிறுவன அலுவலகங்கள் பள்ளிகள் உள்பட அனைத்திலும் பணியாற்றுவோருக்குச் சம்பளம் வழங்கிட வாடகைத் தடைகளை நீக்க கேட்டுக் கொண்டதை” ஏற்று ஒரு ஒப்பந்தம் போட்டோம்.

பலவிதமான ஏற்ற இறக்கங்கள் நட்பு, மிரட்டல் போன்ற பல வகை முறைகளையும் என்னிடம் அந்த பார்ப்பன மேலதிகாரி நளினிமாகச் செய்தார். நான் அவரிடம் அமைதியாக காரண காரியங்களுடன் நடப்புகளைச் சொன்னபோது, “என்னங்க வீரமணி நாங்களா உங்கள் மீது நடவடிக்கை எடுத்துள்ளோம். எல்லா உங்க ஆளுங்கதானே எங்களுக்குக் கையெழுத்துப் போட்டுக் கடிதம் அனுப்பியிருக்கிறாங்க. அதன்மீது தானே இந்த நடவடிக்கை” என்றார். “இதோ பாருங்க” என்று டிராயரைத் திறந்து என்னிடமே அந்தப் புகார் கடிதங்களைக் கொடுத்துப் படிக்க சொன்னார்.

நான் சொன்னேன், “எங்கள் இயக்கத்திலி ருந்து வெளியேற்றப்பட்டவர்கள், நீக்கப்பட்ட வர்கள் இப்படி செய்யாமலா சார் இருப்பார்கள். உண்மை என்ன என்றுதான் உங்களுக்குத் தெரி யுமே; உங்களின் வருமான வரித்துறை அதிகாரி கள் பதுக்கல் மூலம் ஏதாவது தொகையைப் பற்றி இருக்கிறார்களா? எல்லாம் Transparent - வெளிப்படையாகத்தானே இருந்தது. பின் உங்களுக்கே அது பொய்யான புகார் என்பது விளங்கியிருக்க வேண்டுமே“ என்று மளமள வென ஆங்கிலத்திலேயே கூறிட அவர் பதில் ஏதும் சொல்லவில்லை.  அவர் அதனை ஏற்றுக் கொண்டு தனது குரலை கொஞ்சம் அடக்கி வாசித்தார். அவரது இந்த வாடகைக் கட்டுப்பாடு நீக்கத்திற்கு நன்றி தெரிவித்து, அந்தப் பெண் பெயரில் தொகையை வருமான வரித் துறை வங்கியிலிருந்து எடுத்தது பற்றிச் சொன்னேன். “அந்தப் பெண், அம்மா தங்கை மகள் - பினாமி அல்ல, திருமணத்திற்காகவே அத்தொகை, அதைப் பிடிக்கலாமா? நீங்களே சொல்லுங்கள்” என்று சொன்னவுடன், “அப்படியா, அதற்குத் தடை நீக்கம் செய்து உத்தரவு கொடுக்கிறேன்” என்று கூறினார். இதனை வந்து சொன்னவுடன் அன்னையார் அடைந்த மகிழ்ச்சி எனக்கு ஒரு தெம்பினைத் தந்தது - மிசாவிலிருந்து திரும்பிய பிறகு.

இப்படி எத்தனையோ தடைகள், சூது சூழ்ச்சி, துரோகங்கள். அன்னையாரும், அவருக்கு உண் மையாக இருந்தவர்களும். அந் நெருப்பாற்றைத் தாண்டியதால் தான் இயக்கம் இன்று இந்த நிலையை அடைந்திருக்கிறது என்றாலும் எப் போதும் நாம் எதிர் நீச்சல்காரர்கள்தானே.

(தொடரும்)