டாக்டர் அம்பேத்கர் கடிதமும், புதிய வெளிச்சமும்! (1)(2)

 

‘ஒரு புரட்சியாளரின் கடிதங்கள்’ – ‘Letters of Revolutionary’ என்ற தலைப்பில் வெளியாக்கப்பட்டுள்ள இந்த கடிதத் தொகுப்பில் பல கடிதங்கள் – இடம் பெற்றுள்ளன என்றாலும், சிலவற்றை அறிந்து கொண்டால் பலரைப் பற்றியும் அவர்களது சிந்தனைகளும், செயலாக்கங்களும் பற்றிய வரலாற்று நிகழ்வுகள் நமக்கு ஒரு புதிய வெளிச்சத்தைத் தரும். தெரிந்த தலைவர்கள்; அவர்களைப் பற்றித் தெரியாத – மற்றவர்கள் தெரிந்துகொள்ள வேண்டிய முக்கிய தகவல்கள், கண்ணோட்டங்கள்  பற்றித் தெரிந்தால் ‘ஒப்பனை’ இல்லாத உண்மைகளை நாம் புரிந்து ஒரு தெளிவான மதிப்பீட்டினைப் பெற முடியும் என்பதை இக்கடிதங்கள் காலக் கண்ணாடியாக நமக்குக் காட்டுகின்றன.

எடுத்துக்காட்டாக, டாக்டர் அம்பேத்கர் அவர்களது வரலாற்று முக்கியத்துவமுள்ள  எழுத்துகளைக் கொண்ட  ‘‘அரிய, பெரிய ஒரு நூல்’’ (Magnum Opus) என்று பலராலும் பாராட்டப்படும் நூல்தான் ‘Buddha and His Dhamma’ – ‘‘புத்தமும் – தம்மமும்’’ (புத்தரும் அவரது கொள்கை நெறியும்) என்ற அற்புதமான ஆய்வு ஆவணம் போன்றதொரு நூல். அந்த நூலை அவர்கள் வெளியே கொண்டு வந்து மக்களுக்குச் சேர்க்க இறுதியில் அப் புத்தகத்தை அச்சிட்டு வெளிவர அவர் பட்ட பாடுகள் எவ்வளவு?

‘‘அச்சுச் செலவு  20  ஆயிரம் ரூபாய் என்பது எனக்கு மிக அதிகமான தொகையாகும். எல்லாப் பகுதி (நண்பர்கள் மூலம் நிதி உதவி) உதவியையும் நாடி முயற்சி செய்கிற நிலையில் – அந்த அளவுக்குச் செலவிட என்னிடம் நிதி இல்லை என்பதால் தங்களிடம் ஒரு வேண்டுகோள் வைக்கிறேன்.

இந்திய அரசாங்கம் எனது அந்தப் புத்தகத்தை 500 பிரதிகள் வாங்கி, நூல் நிலையங்களுக்கும், முக்கியப் பிரமுகர்களுக்கும், கல்விமான்களுக்கும் அனுப்பினால் புத்தரின் 2500ஆம் ஆண்டு விழாவை கொண்டாடவிருக்கும் இந்திய அரசுக்கு, அது ஒரு சிறப்பான அம்சமாக அமையும். பவுத்தத்தினைப் பற்றி உங்களது ஆர்வத்தை நான் நன்கு அறிவேன்.

அதனால் உங்களை நாடுகிறேன்.

நிச்சயம் தாங்கள் உதவிடுவீர்கள் என்று நம்புகிறேன்.’’

தங்கள் உண்மையுள்ள

பி.ஆர். அம்பேத்கர்

(ஆங்கிலக் கடிதத்தின் தமிழ் மொழியாக்கம்)

மேற்காட்டிய கடிதத்தைப் படித்தவுடன் என் கண்களில் நீர் கசிய ஆரம்பித்தது.

பொது வாழ்வில் 40 ஆண்டுகளுக்கு மேல் உள்ளவர்; வெளிநாடுகளில் படித்துப் பட்டம் பெற்று, பல பெரும் பதவிகளை வகித்த ஓர் உலகமகா அறிஞரான  டாக்டர் அம்பேத்கரின் இறுதிக் கால நிதி நிலை எப்படி இருந்தது என்று பார்த்தால், பொது வாழ்வில் அவரது நேர்மை, தூய்மை, தனக்கென வாழாமல் பிறருக்காக – தொண்டறச் செம்மலாக, தந்தை  பெரியாரைப் போல வாழ்ந்துள்ளார் என்பதை, இன்றைய படாடோபத்தினை  விரும்பும் அரசியல் தலைவர்கள், பதவியாளர்களுடன்  – இவரை ஒப்பிட்டுப் பார்த்து ‘உண்மையின் கதி இதுவா?’ என்ற கேள்வியினைக்  கேட்டு, அதுதான் அவர் வாழ்க்கை ஒளி என்றே வரலாறு அவரை உச்சத்தில் மெச்சிக் கொண்டாட வைக்கும்.

அதற்குப் பிரதமர் நேரு பதில் என்ன? நாளை பாருங்கள்.

(வளரும்)

- விடுதலை நாளேடு, 19.08.26

பிரதமர் பண்டித நேரு அவர்கள் டாக்டர் அம்பேத்கருக்கு எழுதிய பதில் கடிதம் இதோ:

ஆங்கிலத்தின் தமிழ் மொழியாக்கம்:

எண். 2196-PMH/56

புது தில்லி

செப்டம்பர் 15, 1956

அன்பார்ந்த டாக்டர் அம்பேத்கர்,

‘‘செப்டம்பர் 14ஆம் தேதியிட்ட தங்களின் உங்கள் கடிதம் கிடைத்தது. நீங்கள் கேட்டுக் கொண்டபடி உங்கள் நூலின் அதிக எண்ணிக்கையிலான பிரதிகளை வாங்குவது எங்களால் இயலுமா என்பதில் எனக்குச் சந்தேகமே உள்ளது. புத்த ஜெயந்தி விழாவையொட்டி வெளியீட்டிற்காக ஒரு குறிப்பிட்ட தொகையை நாங்கள் ஒதுக்கியிருந்தோம். அந்தத் தொகை தீர்ந்துவிட்டது, மேலும் உண்மையில் அதிகமாகி விட்டது. நாங்கள் நிதியுதவி அளிக்க இருந்த பவுத்தம் தொடர்பான சில நூல் திட்டங்களைக்கூட நிராகரிக்க வேண்டியிருந்தது. எனினும், உங்கள் கடிதத்தை புத்த ஜெயந்தி குழுவின் தலைவரான டாக்டர் ராதாகிருஷ்ணனிடம் அனுப்பி வைக்கிறேன்.

வெளிநாடுகளிலிருந்து பலர் வருகை தரும் புத்த ஜெயந்தி விழாக் காலத்தில், டில்லியிலும் மற்ற இடங்களிலும் உங்கள் நூலை விற்பனைக்கு வைக்கலாம் என நான் பரிந்துரைக்கிறேன். அப்போது அது நன்கு விற்பனையாகக் கூடும்’’.

தங்கள் உண்மையுள்ள,

ஜவஹர்லால் நேரு

டாக்டர் பி. ஆர். அம்பேத்கர், எம்.பி.,

26, அலிபூர் சாலை,

சிவில் லைன்ஸ், டெல்லி.

 

இவ்வாறு நிதி உதவிட வாய்ப்பில்லை என்றுகை விரித்தார் நேரு!

2500 புத்த ெஜயந்தி கொண்டாட்டங்களை நடத்தி, உலகிற்கு வெளிச்சம் காட்டிட இந்திய அரசின் கஜானாவில் அதுவும் பல லட்சங்களை அப்போது ஒதுக்கி ‘2500 Years of Buddha’ போன்ற (டாக்டர் இராதாகிருஷ்ணன் அவர்களின் முன்னுரையுடன் வெளியிடப்பட்ட  நூல்) ஒன்றிய  அரசு நூல் வெளியீடு என்று நடத்தியது. ஆனால் இந்த ரூ.20 ஆயிரம் தொகையைப் பெற டாக்டர் அம்பேத்கரின் நூல்களை  நூலகங்களுக்கு அனுப்பி உதவிட ஏனோ நேருவால் முடியவில்லை?

இதைப் பணமில்லை என்று நம்ப முடியுமா? அதைவிட மிக மிகக் கசப்பான உண்மை – ‘‘மனமில்லை’’ என்பதுதானே சரியானதாக இருக்க முடியும்.

முற்போக்காளர் நேருவின் இந்த நடவடிக்கைக்கு   அரசியல் காரணமா அல்லது வேறு கண்ணோட்டமா என்பது  புரியவில்லை

அதைவிட சிரிப்பு வரக்கூடிய அதில் ஒன்று என்ன தெரியுமா?

புத்த ஜெயந்தி கமிட்டியின் தலைவர் இராதாகிருஷ்ணன் அவர்களுக்கு டாக்டர்  அம்பேத்கரின் கடிதத்தை அனுப்பி வைத்துள்ளேன் என்று  பிரதமர் நேரு கூறியதுதான்!

உங்கள் புத்தகங்களை விற்பனையாளர்களுக்கு அனுப்புங்கள். டில்லி விழாவிற்கு உலகின் பல பகுதிகளிலிருந்தும் விழாவிற்கு வருகிறவர்கள் பலரும் வாங்கக்கூடும் என்பது ஒரு இலவச அரியதொரு (கருத்து தானம்) வழி கூறி, சோஷலிசம் பேசிய பண்டித நேரு இப்படி பதில் எழுதினார்.

அதற்குப் பின்னே இருப்பது எதுவோ! வாசகர்களே தீர்மானிக்கட்டும்.

எவராலும் இதை நியாயப்படுத்த முடியுமா?

- விடுதலை நாளேடு, 20.08.26

வாருங்கள், இந்தக் கருவூலத்தைப் பாருங்கள், படியுங்கள்!

 சில நாள்களுக்கு முன் சீரிய சிந்தனையாளரும், சிறந்த  எழுத்தாளருமான அருமை சகோதரர் கவுதம சன்னா அவர்களும், அதேபோல் சிறந்த ஆய்வாளரும், முற்போக்கு சிந்தனையாளரும், பெரியார் – அம்பேத்கரின் கருத்தாளருமான ஜெர்மனி வாழ் சுபாஷினி அவர்களும் என்னை சந்தித்து, பாபா சாகேப் டாக்டர் அம்பேத்கர் அவர்களது உரைகள், எழுத்துகள் முதலியவற்றை பல புதிய முறையில் விளக்கப்பட பல நூல்கள் என்ற அறிவு நிதியை அளித்தனர்; தோழர் டாக்டர் ஒளிவண்ணன் அவர்களும் உடன் இருந்தார்.

கடந்த சில ஆண்டுகளில் திரு.கவுதம சன்னா அவர்கள் கடுமையாக உழைத்து, பெரும் பொருட் செலவில் – தமிழ்ச் சமூகத்தை ‘அம்பேத்கரியம் இதுதான்’ என்று விளங்கிக் கொள்ளும் வகையில் அரிய தொகுப்புகளாக அவை அமைந்தன.

வியந்துபோனேன்! எளிதான சாதனை அல்ல அது. எழுத்து, பதிப்புலகில் அது ஓர் இமாலயச் சாதனை!!

விடுதலைச் சிறுத்தைகள் கட்சித் தலைவர் அருமை சகோதரர் முனைவர் தொல். திருமாவளவன் அணிந்துரையோடு வந்த அந்தக் கருத்துக் கருவூலத்தை நேர நெருக்கடியிருந்த போதிலும்,  ரயில், கார் பயண நேரத்தில் படித்து விடும் ஒரு மகிழ்ச்சி நோய் !(?) எனக்கு எப்போதும் உண்டு. அதன்படி படித்து எழுதுகிறேன்.

புரட்சியாளர் டாக்டர் அம்பேத்கரின் எழுத்துகள், பேச்சுகள், ஆவணங்கள் (அவரது கடிதங்கள் உட்பட) என பல தொகுதிகளாக கொணரப்பட்டுள்ளது. ‘அம்பேத்கரியம் வழிகாட்டி’ என்பது அரிய படங்களுடன் அம்பேத்கரின் நூல்கள் உட்பட பல நூல்களின் தமிழாக்கம் உள்ளன.

முன்பு பெருமைக்குரிய பேராசிரியர் அரசு  மற்றும் சீரிய பகுத்தறிவாளர் புலவர் செந்தலை கவுதமன் போன்ற நண்பர்களைக் கொண்டு ‘திராவிட மாடல்’  அரசின் உதவியோடு, குறைந்த விலைக்கு நியூசெஞ்சரி வெளியீடு வந்ததும் ஒரு வகை மக்கள் பதிப்பாக மதிப்பும், பாராட்டத்தக்கவகையில் அமைந்தது என்ற  மற்றொரு வகையில் முக்கிய மானது!

சகோதரர் கவுதம சன்னா அவர்களது இந்தத் தொகுப்பில் சிறப்புக்குச் சிறப்புச் சேர்க்கக்கூடிய, இதுவரை தமிழ் கூறும் நல்லுலகத்திற்கு கிடைப்பதற்கரிய பொன்னான வாய்ப்பு – புரட்சியாளர் டாக்டர் அம்பேத்கர் அவர்களின்கடிதங்களாகும் (இது ஆங்கிலத் தொகுப்பு).

1936இல் முதன் முதலில் 90 ஆண்டுகளுக்கு முன்பே, தமிழ்நாட்டிற்கு டாக்டர் அம்பேத்கர் அறிமுகமாகாத கால கட்டத்திலேயே, அவரது வரலாற்றுப் பெருமை இது.  அந்நாளில் அவர் ஆற்றவிருந்து, ஆற்றாது மறுத்து வெளியான  Annihilation of Caste என்ற நூல் – அதனைக் கேள்வியுற்று அந்த ஆங்கில உரையை கடிதவியலில் டாக்டர் அம்பேத்கரை அனுப்பச் சொல்லி, தனது ‘பச்சை அட்டை’, ‘குடிஅரசு’ வார ஏட்டில் தொடராக வெளியிட்டு பிறகு ‘ஜாதியை ஒழிக்க வழி’ என்ற தலைப்பில் மக்களிடம் சேர்க்க 4 அணா விலையில் அச்சிட்ட முன்னோடி அறிவு ஆசான் தந்தை பெரியார் என்பதை இன்றைய இளைய தலைமுறையினர் அறிந்து மகிழக் கடமைப்பட்டவர்களாவர்.

அதனால்தான் தொடர்ந்து நாம் கூறி வருகிறோம் தந்தை பெரியாரும், டாக்டர் அம்பேத்கரும் ஒரு நாணயத்தின் இரண்டு பக்கங்கள் என்று!

‘சமூக விடுதலை’ என்பது அந்த நாணயம்தான் – பெற்றுத் தரத்தக்க ஒன்றாகும்.

புரட்சியாளர் டாக்டர் அம்பேத்கரின் பல தரப்பட்ட கடிதங்களைப் படிக்கும்போது, நம்மை அறிய வைக்க  அவர்தம் எதிர் நீச்சல் – அவருக்குப் பேராதரவு தந்து படிக்க உதவிய சமூகப் புரட்சியாளர், பிற்பட்ட சமுதாயத்தின் முதற் கடமையான இடஒதுக்கீடு மூலம் அதனை சமப்படுத்த முயன்ற (1922 – ஒரு நூற்றாண்டு) கோலாப்பூர் மன்னர் சிவாஜி பரம்பரை  சத்ரபதி சாகு மகராஜ் அவர்களது கடிதம் போன்ற அரிய தகவல்கள், கடித இலக்கியமாய், சிந்தனைச் செல்வமாய் நமக்கு கிடைக்க கவுதம சன்னாவின் கடும் உழைப்பு நமக்குக் கிடைத்திருக்கிறது.

அதன் சிலகடிதங்களிலேயே அதன் மூலம், அக்காலத்தில் அரசியல் பொது வாழ்க்கை எப்படிப் ‘படி’ உயர் ஜாதியினர் ஆதிக்கக்களமாய் அவர்கள் எழுதியதே எல்லோருக்கும் பழைய ஒப்பனை, ‘வேத சரக்கு’ என்று கூறி, தங்களது சமூக அநீதியை நியாயப்படுத்தியது பற்றிய பல தகவல்கள்  இன்றைய தலைமுறையை வெகுவாக சிந்திக்க வைக்கும் கடிதங்களாகும். சிலவற்றைப்பற்றி ஒரு சிறு தொடராக உங்களுக்குத் தருவதில் நமக்கு ‘ஈத்துவக்கும் இன்பம்’ என்ற ‘‘சுயநலம்’’ பெறுகிறோம்.

(வளரும்)

- விடுதலை நாளேடு, 18.8.26

டாக்டர் அம்பேத்கர் எழுதிய காதல் கடிதம் (1,2)

வாழ்வியல் சிந்தனைகள்-கி.வீரமணி

December 17, 2021 • Viduthalai

டாக்டர் அம்பேத்கர் எழுதிய காதல் கடிதம் (1)

பொதுவாழ்வில் உள்ள தலைவர்கள், பொது நலத்துக்கான போராளிகள் தங்களது மண வாழ்க் கைக்குப் பின், அவர்களது வாழ்விணையர்களோடு இணைந்து வாழும் தியாகம், அத்தகைய ஆண்களை விட பெண்களுக்கு மிக மிக அதிகம்.

முழுக் குடும்பப்பொறுப்பு என்ற தாங்கொணாத சுமை - பாரமாக அவர்களை நாளும் அழுத்துகிறது.

தனது 'தலைவனான' வாழ்விணையரின் லட்சியப் பயணத்தின் சோதனைகளை, எதிர் நீச்சல்களை, அவர்களது வறுமை, வெளியே சொல்ல முடியாத சங்கடமான கடமைக்கான பயணத்தில் சந்தித்த நெருக்கடிகள் இவை ஏராளம்! ஏராளம்!!

ஆண்களுக்கு - பலரிடம் பேச, சந்திக்க வாய்ப்பு- போராட்ட சிந்தனைகள் - இவை 'குடும்பத்தின்' கவலைகளை, சுமைகளை மறக்கச் செய்து அவர் களைக் காப்பாற்றி விடுகின்றன! இந்த வாய்ப்பு கூட அவர்களது குடும்பத் தலைவிகளுக்கு கிட்டுவது இல்லை!

மன அழுத்தமும், சோகமும் சொல்ல முடியாதவை களாக தொடரும் அவலம்!

டாக்டர் பாபா சாகேப் அம்பேத்கரின் தனி வாழ்க்கை பற்றி பலரும் அறிந்திருக்க வாய்ப்பில்லை.  காதல் மனைவி அம்மா ரமாபாய் அவர்களின் கணவராக இருந்த டாக்டர் அம்பேத்கர் எப்படிப்பட்ட சுமையை அவருக்குத் தந்தும், எத்தகைய ஆறுதலும், அன்பும் வழங்கிய மனிதம் 'பூத்த மாமனிதர்' ஆகவும் விளங்கினார் என்பதை நாமெல்லாம் தெரிந்துகொள்ள 'தலித் முரசு' ஆசிரியர், 'புரட்சிப் பூ' புனிதப் பாண்டியன் அவர்கள் சில நாட்களுக்கு முன் பெரியார் திடலில் என்னைச் சந்தித்து, சில அருமையான நூல்களையும், டாக்டர் அம்பேத்கர் ஆண்டு நாட் காட்டியையும் தந்து உரையாடிச் சென்றார். தமிழ்நாடு அரசு தக்க வகை யில் அவரை அடையாளம் கண்டி ருக்கிறது! மகிழ்ச்சி அவர் தந்தது.

16 பக்கங்களைக் கொண்ட மிகச் சிறிய  அந்த நூலின் தலைப்பு 'டாக்டர் அம்பேத்கர் எழுதிய காதல் கடிதம்' - 'உன் இன்மையை நினைத்து ஏங்கு கிறேன்' என்று துணைத் தலைப்பு -

அன்னை ஈ.வெ.ரா. நாகம்மையார் 1933 மே 10ஆம் தேதி  ஈரோட்டில் மறைந்த துயரத்தில் 'குடிஅரசு' ஏட்டில் அந்த வாரத்தில் எழுதிய இரங்கல் தலையங்கம், ஓர் இணையற்ற இலக்கியக் கருவூலம்!

வாழும் நிலையில் வறுமைத் தேள்கடியைப் பொருட்படுத்தாது, இங்கிலாந்தில்  இரவு, பகல் பாராது படிப்பில் மூழ்கிய கல்விக் கடல் அம்பேத்கர் தனது துணைவியருக்கு உணர்ச்சிக் கொப்பளிக்க, அன்பு அருவிபோல் கொட்டிக் கொண்டே இருக்கும் நிலையில் எழுதிய அந்த 16 பக்க சிறு வெளியீடு நம்மை - கண் களை கண்ணீர் ஊற்றாக்கி விட்டது!

பசி, வறுமை, அவமானம் இதற் கிடையே உறுதி குலையாத லட்சிய இலக்கு நோக்கிய பயணம் - இவைகள் ஒரு மனிதனின் தனி வாழ்க்கையை எப்படிப்பட்ட துயர மேகங்கள் சூழ்ந்து, துன்ப நிகழ்வு களாக்கி விடுகின்றன என்பது உணர்ந்த அவரது பாசம் பொழிந்த அவரது துணைவியாரின் கடமை உணர்ச்சி தான் எவ்வளவு மகத் தானது!

அம்பேத்கர் போன்று பெரியள வில் படித்தவர் அல்ல; அவரைக் கைப்பிடித்தவர்; ஆனால் கடமை யால் கடைசி வரை கட்டுண்ட கரங்கள், கண்ணியமும், கடமையும், அவர்களிரு வருக்கும் கேடயங்களாக்கி உணர்வுகளுக்கு இல்லை தடை ஏதுவும் என்பது போல், அன்பும் வாஞ்சையும் மடை திறந்த வெள்ளமாகி ஓடும் காட்சியை, உயிரோட்டத்தை உண்மை எழுத்தாளர் காட்டு வதைப் படித்து நாம் கண்ணீரைத் துடைத்துக் கொண்டோம்!

மேலும் உங்கள் ஆவலை சோதிக்க விரும்ப வில்லை.

இப்படியே இப்பகுதியில் வெளியிடுகிறேன். ஊன்றிப் படிப்பீர்!

உண்மையான பொது நலம் எப்படி சோதனைக் களங்களாகின்றன என்பதைப் புரிந்து கொள்ள அது பாட நூல் போலப் பயன்படும். (அது மராத்தியில் எழுதப்பட்டதின் மொழியாக்கம்).

"ரமா!

எப்படி இருக்கிறாய் நீ?

இன்று உன்னையும் யஷ்வந்தையும் அடிக்கடி நினைத்துக் கொண்டே இருக்கிறேன். அதிலும் ரமா, உன்னை நினைக்கும் பொழுது நான் நிறையவே சோர்ந்து விடுகிறேன்.. கடந்த சில நாட்களாக இங்கே நான் ஆற்றிய உரைகள் பலவும் மிகப் பெரிய விவாதங்களை எழுப்பி இருக்கிறது. வட்ட மேசை மாநாட்டில் பேசப்பட்ட உரைகளில் என்னுடையது ஆகச் சிறந்ததாகவும் உத்வேக மூட்டக்கூடியதாகவும் இருந்ததாக இங்கு வெளிவரும் நாளேடுகளில் எழுதி இருக்கிறார்கள்.

ஆனால் மாநாட்டில் என்னுடைய செயல்பாடுகள் அனைத்திலும் வெளிப்படுவது கண்களின் முன்வந்து நிழலாடும் நம் தேசத்தின் ஒடுக்கப்பட்ட மக்களுடைய முகங்கள்தான்! ஆயிரக்கணக்கான ஆண்டுகளாய் வலியிலும் வேதனையிலும் அவர்கள் உழன்று கொண்டிருக்கிறார்கள். தாங்கள் படும் வேதனை களுக்கு எந்தக் காலத்திலும் ஒரு வழியோ தீர்வோ கிடைக்கப் போவதில்லை என்று அவர்கள் முடிவு செய்துவிட்டார்கள். அதில் நான் சற்று அதிர்ந்துதான் போகிறேன் ரமா. இருந்தாலும் அவர்களுக்கு இழைக்கப்படும் கொடுமைகளுக்கு எதிராக நான் இங்கே நின்று கொண்டிருக்கிறேன். அதற்கான மாபெரும் அறிவுசார் வலிமையை எனக்குள் நான் உணர்கிறேன். அது, உணர்ச்சிகளால் நிரம்பிய என் இதயமும் சிந்தனைகளால் நிரம்பிய என் உள்ளமும் எனக்கு வழங்கிய வலிமையாக இருக்கலாம்.

(தொடரும்)