'கவிக்கோவின் காக்கை சோறு' எழுப்பும் கேள்விகள் (1)

5.8.2018 அன்று பகுத்தறிவு எழுத்தாளர் மன்ற மாநிலத் தலைவர் மதுரை முனைவர் வா. நேரு அவர்கள், கவிக்கோ அப்துல் ரகுமான் அவர்கள் எழுதிய 240 பக்கங்கள் கொண்ட 'காக்கைச் சோறு' என்ற தலைப்பிடப்பட்ட கட்டுரைத் தொகுப்பு நூல் ஒன்றை - எனக்கு வழங்கினார்.

படித்தேன் - சுவைத்தேன் - கவிக்கோவின் இலக்கியச் செறிவும், தமிழ்அறிவும் காலத்தால் அழியாத கருத்துப் பெட்டகங்கள். காலம் அவரை 'இயற்கையின் கோணல்' புத்தி காரணமாக பறித்துக் கொண்டது என்பது கொடுமையோ கொடுமை!

நல்ல பேராசிரியராக அவர் இருந்து அவரால் உருவாக்கப்பட்ட மாணவர்கள் இன்றும் புகழ் பெற்ற பேச்சாளர்கள் - கவிஞர்கள் - எழுத்தாளர்கள் ஒளி வீசுகிறார்கள்.

கவிக்கோவின் முதல் கட்டுரையே இன்றைய தமிழ்ப் பாட புத்தகங்களில் உள்ள குறைபாட்டினைச் சுட்டி 'கடிதோச்சி மெல் எறிதலை'ச் செய்வதாக உள்ளது!

பள்ளிகளில் நம்மில் பெரும்பாலோருக்குப் பாடமாக அமைந்ததையே ஆசிரியர் அப்துல் ரகுமான் அக்கட்டுரையில் சுட்டி, நெற்றியடிக் கேள்வியை நேர்மையுடன் கேட்கிறார்.

புத்தாக்கச் சிந்தனைகள் இளைய தலைமுறைக்கு வர, பாட புத்தகங்கள் அறிவை, விரிவு செய்து, தூண்டத் துணை நிற்க வேண்டும்.

இன்று...? அப்படி இல்லையே! இதோ சில எடுத்துக்காட்டுகள்.

எடுத்துக்காட்டு ஒன்று (பக்கம் 12)

'பூதகியின் பால்' என்ற முதல் கட்டுரையின் முதல் பகுதி இன்று (நாளை மறுபகுதியைப் பார்க்கலாம்).

"கஸபியான்கா கதையை ஒரு நாள் வகுப்பில் சொன்னேன்.

கஸபியான்கா ஒரு மாலுமியின் மகன். அவனுக்குக் கப்பலைப் பார்க்க வேண்டும் என்று ஆசை. அவன் தந்தை ஒருநாள் அவனை அழைத்துச் சென்று கப்பலைச் சுற்றிக் காட்டினார்.

அப்போது திடீரென்று கீழ்த் தட்டிலிருந்து "தீ... தீ..." என்று கூக்குரல் எழுந்தது. கஸபியான்கா வின் தந்தை அவனை மேல் தட்டில் ஓரிடத்தில் நிற்க வைத்து, "ஏதோ தீ விபத்துப் போலிருக்கிறது. நான் கீழே சென்று பார்த்து வரும் வரை இங்கேயே நில். இங்கிருந்து அசையாதே" என்று சொல்லி விட்டுக் கீழே போனார்.

போனவர் திரும்பி வரவில்லை. தீ விபத்தில் சிக்கி உயிரிழந்து விட்டார். தீ மேலே பரவி கஸபியான்காவைச் சூழ்ந்தது. கப்பலில் இருந்தவர்கள் "சீக்கிரம் நீரில் குதி. அப்போதுதான் தப்பிக்க முடியும்" என்று அவனைப் பார்த்துக் கத்தினர். அவனோ "உயிர் போனாலும் பரவாயில்லை. தந்தை சொல்லைத் தட்டக் கூடாது" என்று அங்கேயே நின்றான். அதனால் அவனும் தீயில் சிக்கி உயிரிழந்தான். 'தந்தை சொல்லைத் தட்டாத தனயன்' என்று எல்லோரும் அவனைப் பாராட் டினார்கள்.

நான் இந்தக் கதையைக் கூறிவிட்டு "இந்தக் கதையின் மூலம் நீங்கள் என்ன தெரிந்து கொண்டீர்கள்?" என்று மாணவர்களைக் கேட்டேன்.

ஒரு மாணவன் சொன்னான்: "தந்தை சொல் கேட்டால் ஆபத்துத்தான்" மற்ற மாணவர்கள் சிரித்தனர்.

அந்த மாணவன் சொன்னதில் தவறேதுமில்லை. ஒரு பரிசோதனையாகத்தான் நான் இந்தக் கேள்வியைக் கேட்டேன். நான் எதிர்பார்த்த பதிலைத்தான் மாணவன் சொன்னான்.

இது கதை கூட அல்ல. உண்மையில் நிகழ்ந்த ஒரு வரலாற்றுச் சம்பவம். உயிருக்கு ஆபத்தான நிலையில் கூட தந்தை வாக்கை மீறக் கூடாது என்று தன் உயிரையும் தியாகம் செய்த கஸபியான்காவின் உறுதி பலரை மனம் உருகச் செய்திருக்கிறது. அதனால்தான் இந்தச் சம்பவம் பல நாடுகளுக்கும் பரவி நம் நாட்டிலும் பாடப் புத்தகங்களில் இது தவறாமல் இடம் பெறுகிறது. ஆனால் சிந்தித்துப் பார்த்தால் ஓர் எதிர்மறையான விளைவை  ஏற்படுத்தும் சாத்தியம் இதில் இருப்பதை உணரலாம்.

மனிதன் எதையும் அதன் பலனைக் கொண்டுதான் மதிப்பான்.

இந்தச் சம்பவம் எதை உணர்த்துகிறது?

தந்தை சொல் தட்டாத தனயனின் தியாகத்தை மட்டுமா? தந்தை சொல் கேட்டதால் அல்லவா அவன் அநியாயமாக உயிரிழக்க நேர்ந்தது? இப்படியும் எண்ண இடம் இருக்கிறதல்லவா?

ஏற்கெனவே தந்தை சொல் கேட்காத தனயர்கள் பெருகி வரும் இக்காலத்தில் இத்தகைய கதைகள் நிலைமையை இன்னும் மோசமாக ஆக்கி விடாதா?

தந்தை சொல் கேட்டதால் ஒருவன் ஆபத்திலிருந்து தப்பினான் என்பதாகக் கதை அமைந்திருந்தால் அல்லவா படிப்பவனுக்கும் தந்தை சொல் கேட்பது நல்லது என்ற எண்ணம் ஏற்படும்? எதிர்மறையான அல்லது தவறான கருத்துக்களை ஏற்படுத்தும் பல கதைகளைப் பாடங்கள் என்ற பேரில் நாம் பிள்ளைகளுக்குச் சொல்லிக் கெ()டுத்துக் கொண்டிருக்கிறோம்".

நமது பாடத் திட்டங்கள் விழிப்புணர்வு பெறும் வகையில், சமயோசிதமாக நடந்து கொள்ளும் முறையில் இன்று பெரிதும் சொல்லிக் கொடுக்கப்படு கின்றனவா? இல்லையே; அவர் கேட்கும் கேள்விப்படி அறிவை, தன்னம்பிக்கையுடன் சரியான முடிவுகளை எடுக்க விடாமல் கெடுத்துக் கொண்டும் - தடுத்துக் கொண்டும் தானே உள்ளது!

பழைய காக்கை - நரிக் கதையை....

(நாளை பார்ப்போம்)

- விடுதலை நாளேடு, 19.10.18

அறிவோமா? - குடற்புண் பற்றி! (1,2&3)

உடலில் ஏற்படும் குடல்புண் - அல்சர் (Ulcer) பற்றிய வயிறும் -வாழ்வும் - குடற்புண் சிகிச்சைகள் என்பதைப்பற்றி தஞ்சையில் உள்ள பிரபல குடல் அறுவை சிகிச்சை நிபுணர் - மருத்துவர் - டாக்டர் நரேந்திரன் (Ph.D) அவர்கள் நமது 'பெரியார் மெடிக்கல் மிஷன்', பெரியார் நூலக வாசகர் வட்டம், திராவிடர் கழகம் ஆகிய அமைப்புகளின் சார்பில் (10.10.2018, சென்னை பெரியார் திடலில்) மிகச் சிறந்ததோர் விரிவுரை - விளக்கவுரை நிகழ்த்தியும், கேள்விகளுக்குப் பதில் அளித்தும் (இரண்டும் இணைந்து சுமார் ஒன்றரை மணி நேரத்திற்குமேல்) உரையாற்றினார்.

'வகுப்பெடுத்தார்' என்பதே பொருத்தமான சொற்றொடர் ஆகும்.

தலைமை தாங்கிய பிரபல பொது மருத்துவர் பேராசிரியர் டாக்டர் எம்.எஸ். இராமச்சந்திரன் அவர்களும் அவருக்கே உரித்தான முறையில் அருமையாக - வந்திருந்தோருக்குப் 'பாடம்' நடத்தினார்.

அவர் கூறியவற்றில் அன்றாட வாழ்க்கையில் நமக்கு ஏற்படும் பல மனச் சிக்கல்களை எளிமைப் படுத்திப் பேசினார்.

தினம் தினம் காலையில் எழுந்தவுடன் கழிப் பறைக்குச் சென்று மலம் கழித்தலை ஒரு பழக்கமாக்கிக் கொள்வது உடல் நலத்திற்கு மிகப் பெரிய உதவிடும் செயல்.

அமர்ந்து சில நிமிடங்கள் இருந்து பழக்கப்படுத்திக் கொண்டால் நமது உடலின் மணி (Body Clock) அதற்குப் பெரிதும் ஒத்துழைக்கும்; தவறி ஒரு நாள் மலம் கழிக்கா விட்டாலும்கூட சிலர் அதனையே பெரிதாக நினைத்து பதற்றம் அடைந்து, ஏதோ கிடைக்க வேண்டிய  ஒன்று கிடைக்காமல் இழந்து விட்டதுபோல மனசஞ்சலம் (Obsession) கவலை அடைவார்கள். அது தேவை யில்லை,  வேண்டியதில்லை.

மலச்சிக்கலால் எவரும் செத்ததாக வரலாறு கிடையாது. இயல்பாக அந்த உடல் உறுப்புகளே அதனை வெளியே தள்ளி விடும்.

பெருத்த உடல்  (Obesity) பருமன் இருப்பவர் களுக்குக் குடல் புண் வருவதற்கு அதிக வாய்ப்புக்கள் உண்டு. மதுப் பழக்கம், காரத்தை அதிகம் எடுத்து உண்ணல், சில தொற்றுக் கிருமிகள் (வைரஸ்) - இவற்றால் ஏற்படலாம்!

அதிக மது குடிப்பவர்களுக்குத்தான் இந்த 'அல்சர்' குடற்புண் ஏற்படும் என்பதில்லை.

'Non - alcoholic cirrhosis of liver' என்ற நோய் - மதுப் பழக்கம் இல்லாதவர்களுக்கும் கூட ஏற்படக் கூடும். வயிறுபெருத்தல் ("மகோதரம்" - என்று கூட கிராமங் களில் கூறுவதுண்டு) இதில் ஒரு சிறு பகுதியை வெட்டி எடுத்து Biopsy ஆய்வுக்கு அனுப்பி, இதில் புற்று நோய் கிருமிகளால் தாக்கப்பட்டுள்ளதா என்று கண்டறிந்து அதற்கேற்ப தக்க சிகிச்சைகளை மேற்கொள்வது நல்லது!

புகைபிடித்தல் (Smoking) இதற்கு மற்றொரு முக்கிய காரணமாகும். புகை பிடிப்பதால் நுரையீரல்கூட பாழாகி புற்று நோய்க்கு வரவேற்புக் கொடுக்கும்

சர்க்கரை நோய் உள்ளவர்கள், உடல் பருமன் உள்ளவர்கள் இதனை எதிர்பார்க்கத்தான் வேண்டும் - எச்சரிக்கையாக (பரிசோதனை மூலம்) இருப்பது எப்போதும் நல்லது!

தவறிப் போய் இந்த அல்சர் புண் நோய் முற்றுமே யானால், அந்நோயால் பாதிக்கப்பட்டவர்கள் அதிக பட்சம்  5 ஆண்டுகள் வாழக் கூடும்; இடையிலும் மரணம் வரக்கூடும்!

உணவில் அதி-காரம் தவிர்ப்பீர்களாக! உடல் பருமனுக்கும் இடந்தராதீர்!

இப்படி பலப் பல பயனுள்ள அறிவுரைகளை வழங்கி, பிறகு குடற்புண் நோய் மருத்துவர்தம் விளக்கத்திற்குச் சரியான நுழைவு வாயிலை அமைத்துக் கொடுத்தார் டாக்டர் எம்.எஸ். இராமச்சந்திரன்.

டாக்டர் நரேந்திரன் விளக்கங்களை அடுத்து பார்ப்போம்!

(தொடரும்)

-விடுதலை நாளேடு, 12.10.18

சென்னை,  'பெரியார் மெடிக்கல் மிஷன்', பெரியார் நூலக வாசகர் வட்டம், திராவிடர் கழகம் - இணைந்து நடத்திய நலவாழ்வு பரப்புரைக்கான சிறப்புக் கூட்டத்தில் ஆய்வு சொற்பொழிவு போன்றதொரு அருமையான மருத்துவ அறிவுரை - தெளிவுரையை - நிகழ்த்தினார் தஞ்சையில் உள்ள பிரபல, உணவு செரிமான பேராசிரியர் டாக்டர் நரேந்திரன் அவர்கள்!

இவர் மருத்துவக் கருத்துக்களை எளிய தமிழில், கரடு முரடாக இல்லாமல் - மக்கள் விரும்பும் வண்ணம் இதுவரை சுமார் 35 புத்தகங்களுக்கு மேல் எழுதி, பல நூல்களுக்கு அரசாங்கம் முதலிய பல்வேறு அமைப்பு களின் சார்பில் சிறப்பான முறையில் பரிசுகளையும் பெற்ற, கலைமாமணி முதலிய விருதுகளைப் பெற்ற புகழ் வாய்ந்த பெருமகன் ஆவார்.

கணினியின் உதவியோடு தொடுதிரை விளக்கமாக அரியதோர் விளக்கத்தினை தந்தார்.

1. மருந்து முறை - மருந்து மாத்திரை, பரிசோதனை இவை எல்லாம் அவ்வப்போது புதிய புதிய கண்டுபிடிப்புகளின் காரணமாகவே மாறி வருகின்றன.

எடுத்துக்காட்டாக, 1972 வரை ஒரு கட்டம், அடுத்து 1982 - 10 ஆண்டுகள் மற்றொரு  கட்டம்.

2. காலை உணவைத் தவிர்க்கவே கூடாது. நமது பிள்ளைகள், குழந்தைகள் குறிப்பாக மாணவிகள் காலை உணவு சாப்பிடாமல், இரவெல்லாம் தொலைக்காட்சி அல்லது கைத் தொலைபேசி, 'செல்' வாழ்வுடன் காலத்தைக் கழித்துவிட்டு, காலையில் அவசர அவசரமாக எழுந்து - காலைக் கடன்களைக்கூட சரியாகக் கழிக்காமல் 'அரக்க பறக்க' ஓடுவது - வீடுகளில் 'சாப்பிட்டுப் போ' என்ற பெற்றோர்கள், பாட்டி, தாத்தாக்களிடம் சண்டை பிடித்து ஓடோடி பள்ளி, கல்லூரிக்கோ, வேலைக்கோ, செல்வது அநேகமாக எல்லா வீடுகளிலும் நிகழும் அன்றாட நடவடிக்கை தானே!

3. குடல் புண் ஏற்படுவதற்கு அரைகுறையாக சாப்பிட்டு - அவசர கதியில் ஓடுவதால் உணவு சரியாக செரிமானம் ஆகாமல் பித்தப்பையில் கற்கள்கூட உண்டாகும் அளவில் உடல் நோயை - வலியைத் தருவதாகவும்கூட அமையும்.

4. Curry, Worry, Hurry!- கறி, கவலை, வேக வேகம்!  (உணவு)இம்மூன்றும் குடல் புண்களை ஏற்படுத்தக் கூடியவை என்று அழகாக குறுகத்தரித்த குறள் போல விளக்கம் அளித்தார் டாக்டர் நரேந்திரன்!

5. காபி, தேநீர், மது இவைகளால் குடல்புண் - அழற்சி ஏற்பட வாய்ப்புள்ளது. (ஒரு நாளைக்கு 6,7 தடவை குடிப்பது, மது அளவின்றி குடிப்பது இவைகள் நோய்க்கு 'சிவப்புக் கம்பள' விரிப்பு வரவேற்புத் தருவதாகும்.

6. சாலை ஓரம் உள்ள பாணிபூரிகள் வாங்கி கண்டபடி சாப்பிட்டு பசியைப் போக்க வயிற்றை நிரப்புதல்

(தவறான பாலின உறவின் காரணமாக ஏற்படும் கருவைக் கண்டு வெட்கமும், வேதனையும் படும் மனித இனம், அனுமதிக்கப்பட்ட அளவைத் தாண்டி, உண்ணல், உறிஞ்சல், மது குடித்தல் போன்றவை களுக்காக ஏனோ வெட்கப்பட மறுக்கிறது! ஒழுக்கச் சிதைவு உண்ணுதலில்கூட உண்டே! இதை ஏனோ வளரும் மனிதர்களாகிய நாம் எண்ண - ஏற்க மறுக்கிறோம்)

"ஆளும் வளரணும், அறிவும் வளரணும் அதுதாண்டா (தம்பி) வளர்ச்சி"

என்றார் பாட்டுக்கோட்டை அரசர் தோழர் பட்டுக் கோட்டை  கலியாண சுந்தரம் கவிஞர்!

7. மன அழுத்தமும் (Stress) குடல் புண்ணுக்கு முக்கிய காரணம் ஆகும்.

(தொடரும்)

-விடுதலை நாளேடு, 13.10.18

13.10.2018 அன்று வந்த வாழ்வியல் சிந்தனையின் தொடர்ச்சி...

சாப்பிட்ட பிறகு நாம் உண்ட உணவு கீழே செல்லாமல், எதிரெடுத்துவிடும். அதாவது உண்ட உணவு மேலே வருகிறது. திரவமான கார உணவாக அது இருந்தால், அந்த எரிச்சல் சில நேரங்களில் மூக்கு, காதுவரைகூட எகிறி உறுத்தும் நிலை ஏற்படுவது உண்டு.

எச்.பைலோரி என்ற கிருமி நோய்கள் காரண மாக அதிகமான வலி போக்கி மருந்துகளை அவ்வப்போது எடுத்துக் கொள்வதாலோ, புகை பிடித்தல் காரணமோ - அல்சர் (Ulcer) குடற்புண் ஏற்படக் கூடும்.

Acid Reflux என்ற எதிரெடுத்தலைத் தடுக்க இப்படி ஆங்கில மருந்துகள் ரானிடிடின் (Ranitidine), பாண்டோ பிரசோல், பான்-டி போன்றவை களை - வயிற்றில் இப்படி செரிமாணமின்மை நீர் அதிகமாக மேலே வருவதை தடுக்க மருத்துவர்கள் கொடுப்பதுண்டு. ஆஸ்பிரின் 75 வரை தொடர்ந்த வலி போக்கி மருந்துகளைக்கூட -  அவ்வப்பொழுது டாக்டரைக் கேட்காமல், மருந்து கடைக்காரரிடம் கேட்டு - பாதிக்கப்பட்டவர்களே - அவரவர் பழக்கம் - அனுமானப்படி சாப்பிட்டு இதை அதிகப் படுத்திக் கொள்வதும் நடைமுறையில் உள்ள பழக்கமாகி விடுகிறது.

மேலை நாடுகளில் டாக்டர் மருந்து எழுதிக் கொடுத்தால் ஒழிய - இப்படிப்பட்ட மருந்து களையோ மற்றும் Antibiotic என்ற தொற்றுநோய் நிவாரண - கடும் மருந்துகளையோ மருந்து கடை களில் வாங்க முடியாது. நம் நாட்டில் அந்தப்படி கட்டுப்பாடு சட்டத்தில் உள்ளது. பட்டியலில் உள்ள மருந்துகள்'' என்ற மருந்துகளை (Scheduled Drugs) டாக்டரின் பரிந்துரைச் சீட்டு இருந்தால்தான் விற்கவே முடியும் என்பது.

ஆனால், நடைமுறையில் - வியாபாரத்தில் அப்படி ஒரு கட்டுப்பாடான நடைமுறை கடை பிடிக்கப்படாததால், நோயாளிகளும், மருந்துக் கடைக்காரர்களின் பழக்கத்தினாலும், இதற்கு மருந்து கொடுங்கள் என்று நோயாளி கேட்டவுடன், இவர்களே பாதி மருத்துவர்போல, இந்த மாத்திரை, மருந்தை வாங்கி 3 நாள்கள் சாப்பிடுங்கள்; எல்லாம் சரியாகப் போய்விடும்'' என்று அறிவுரை' கூறி, தமது விற்பனையைப் பெருக்கிக் கொள்வது நம் நாட்டில் சர்வ சாதாரணம் - இது ஒரு தவறான பழக்கம்.

டாக்டர்கள் மருந்து எழுதிக் கொடுப்பதில்கூட - நம் அனுபவத்தில் கண்ட ஒரு நடைமுறை உண்மை என்னவென்றால், பெரிய ஸ்பெஷலிஸ்டு டாக்டர்கள் நோயாளியை பரிசோதித்துவிட்டு ஒரு 3, 4 மருந்து மாத்திரைகளை எழுதிக் கொடுத்து விடுவார்கள்.

ஆனால், வழக்கமாக நோயாளியை கண்டு, நோய் - அவரது உடல் நிலைபற்றிய வரலாறு அறிந்த குடும்ப மருத்துவர் (Family Physician) எந்த மருந்து குறிப்பிட்ட இவருக்கு உதவ முடியும், எதைக் கொடுத்தால் சில நேரங்களில் குறிப்பிட்ட நோயாளியின் உடல் ஒத்துழைப்பு தராது என்பதை உணர்ந்தவர்கள் - ஸ்பெஷலிஸ்டு டாக்டர் எழுதிக் கொடுத்த மருந்துகளைக்கூட எடுத்துக்கொள்ள வேண்டாம் என்று கூறிவிடுவார்கள்! அதுதான் சரியான முறை. எனவே, எடுத்த எடுப்பிலேயே ஸ்பெஷலிஸ்டு, சூப்பர் ஸ்பெஷலிஸ்டு (Specialist & Super Specialists) டாக்டர்களிடம் செல்லாமல் இருப்பது நல்லது!

எச்.பைலோரி கிருமியை அழிக்கவேண்டும்,

குடிநீர்மூலம் இக்கிருமிகள் பரவிட வாய்ப்பு உண்டு.

எண்டோஸ்கோப்பி (Endoscopy) மூலம் அறிந்துகொண்டு மேற்கொண்டு மருத்துவ சிகிச் சையை செய்துகொள்ளலாம்.

மன அழுத்தம் - கவலை (Worry - Stress) காரணமாகவும் இது ஏற்படக்கூடும்.

தலைக்காயம் - தீக்காயம் ஏற்பட்டாலும், வயிற்றில் குடல் புண், வலி ஏற்படக்கூடும்.

இதற்கான அறிகுறிகளில் முக்கியமானது நெஞ்சுக் குழி எரிச்சல், மேல் வயிறுப் பருத்தல், வலி, குமட்டல், நடுநிசியில் - அதிவிடியற்காலை வேளையில் உணவு எடுத்துக்கொள்ள வேண்டிய உணர்வு - வலி குறைந்தவுடன்கூட - வயிறு நிரம்பி விட்டதைப் போன்ற உணர்வு - இந்தப் பிரச்சி னைக்கு ஆங்கிலத்தில் ‘GERD' (Gastroesophageal reflux disease) (அமில எதிர்க்களிப்பு) என்று கூறுகிறார்.

(அ) திடீரென எடை :அதிக அளவு குறைதல்

(ஆ) அமிலம் எதிர்த்து மேலே வருதல்

(இ) பசியே இல்லாமல் இருத்தல்

மாரடைப்புகூட சில நேரங்கள் ஏற்பட இது ஒரு அடிப்படைக் காரணமாக அமையக்கூடும்.

எல்லா மேல் பகுதி வயிற்று வலியும் அல்சர் - குடல்புண் அறிகுறி என்ற முடிவுக்கு வந்துவிடக் கூடாது; வேறு நோய்களுக்கான அறிகுறியாக - தொடக்கமாகவும் இருக்க வாய்ப்பு உண்டு.

(1) பித்தப்பைக் கல்

(2) நாட்பட்ட கணைய அழற்சி

(3) இரப்பைப் புற்றுநோய்

கேன்சர் (Cancer) என்ற புற்றுநோய் பற்றிய பரிசோதனைக்கான தேவை  - கீழ்க்காணும் அறிகுறிகள் காணப்படும்.

பசியே இல்லாது இருக்கும்; ரத்தச் சோகை போன்ற அறிகுறிகள்.

உணவில் கவனம் தேவை. மிதக்கும் உணவு' என்ற நல்ல சொற்றொடரை கூறினார் டாக்டர் சு.நரேந்திரன்! எண்ணெய், நெய் இவற்றில் மிதக்கும் உணவை கூடுமானவரை தவிர்ப்பது நல்லது. அவித்த உணவு - இட்லி, இடியாப்பம் போன்ற வையும், காய்கறி - வறுவலைத் தவிர்த்து அவித்து'' உண்ணுதல் நல்லது என்றார்!

கழைக்கூத்தாடிகளுக்கு - குடற்புண் அதிகமாக வர வாய்ப்பில்லை. தலைகீழாக நிற்பது பயன் படுகிறது அவர்களுக்கு வெகுவாக.

எச்.பைலோரி பற்றிய கிருமிகள் CLD Test என் றெல்லாம் பல வளர்ந்த முறைகள் இப்பொழுது வந்துவிட்டன.

இந்நோயை தொடக்கத்தில் கண்டறிந்து விட்டால், பயப்படவேண்டிய அவசியமே இல்லை.

ஒரு சில அறிகுறிகளை நீங்களே யூகத்தின்மூலம் நினைத்துப் ஒரே அடியாய் பயந்துவிடாதீர்கள். மருத்துவர்களின் ஆலோசனைகளை நாடுங்கள். உணவில் கட்டுப்பாடு - வேளைக்குச் சாப்பிடும் பழக்கம் இவைகளைக் கைக்கொள்ளுங்கள்.

- இவ்வாறு விளக்கி கேள்விகளுக்கு சிறப்பான வகையில் பதில் அளித்தார் டாக்டர் நரேந்திரன். கேட்ட அனைவருக்கும் மன நிறைவும், தெளிவும் ஏற்பட்டது என்பதுதான் இப்பொழிவுகளின் வெற்றியாகும்!                                                                                                                                                                                  

-விடுதலை நாளேடு, 14.10.18

மாரடைப்பைத் தடுக்க பாதுகாப்பான உணவுகள் 15 - இதோ! (1,2&3)

அமெரிக்காவில் ஆண்டுதோறும் 6,10,000 பேர்கள் மாரடைப்பால் - இதய நோய் தாக்குதலால் உயிரிழக்கிறார்கள்!

அமெரிக்க மக்கள் நல்வாழ்வுத் துறை தந்துள்ள ஓர் புள்ளி விவரப்படி, ஆண் - பெண் இருபாலருக்கும் உயிர்க்கொல்லி நோயாக இந்த இதய நோய் உள்ளதாம்!

ஒவ்வொரு ஆண்டும் 7,35,000 அமெரிக்கர்கள் இதய நோயால் தாக்கப்படுகிறார்கள்!

இந்தியாவில்கூட இந்த நோயின் தாக்கம், அமெரிக்காவுக்கு சளைத்ததல்ல. பல்லாயிரக்கணக்கில் இந்த நோய் தாக்கியதால் மறைந்தவர்கள் அநேகம்; மீண்டவர்கள் எண்ணிக்கையும், மாண்டவர்களைவிட அதிகம் இருக்கலாம் என்பது ஒரு ஆறுதல் தரும் செய்தியாகும்!

இதய நோயை -  மாரடைப்பு தாக்குதலை உடனடி யாகக் கண்டறிந்து, உடனடியாக மருத்துவ மனைக்கு எடுத்துச் செல்லும் ஆம்புலன்ஸ் வேனி லேயே மருத்துவர்களும், செவிலியர்களும் உடனடிச் சேவை களை, மருத்துவத்தை - கால தாமதிக்காமல் செய்து முடித்து விடுகிறார்கள்!

கடலில் குளிப்பவர்கள் அலை வரும் போது அதில் சிக்கிக் கொள்ளாமல், தலையைத் தூக்கி, அலையின் இழுப்பிலிருந்து தப்பி விட்டால் தாராளமாகத் தப்பிக்க முடியும்! அதுபோலத்தான் உடனடி சிகிச்சை, உயிர்க் காக்கும் வாய்ப்பை நிச்சயம் அது தரும் என்பது உறுதி. நானே அதற்கு சாட்சியாகும்!

மாரடைப்பு நோய்க்கு முக்கிய காரணம், நமது இருதயத்திற்குச் செல்லும் ரத்தக் குழாய்களில் கொழுப்பு சேர்ந்து - இரத்த ஓட்டம் இயல்பாக நடைபெறுவதை தடுப்பதினால் தான் ஏற்படுகிறது!

இதற்கு நோயின் முதல் நாடினால் காரணம் - நாம் உண்ணும் உணவுகளும் மற்ற காரணங்கள் கூடுதல் சதை, உடற்பயிற்சி இன்மை எனப் பல உள்ளன! கொழுப்புச் சத்துள்ள வேக உணவுகளை நமது மக்கள்  - குறிப்பாக இளைய தலைமுறையினர் ஏராளம் சாப்பிட்டு தங்களது வாழ்வை நாளும் குறைத்துக் கொள்வதில் போட்டி போடுவது வேதனைக்கும், வெட்கத்திற்கும் உரியதாகும்.

உணவு முறையில் கவனம், அன்றாட வாழ்க்கை முறையில் மாற்றம் (Change in Life Style) எடுத்தால் இதய நோயினை கூடுமான வரை தடுக்கலாம்! மன அழுத்தம் - இறுக்கம் மற்றொரு முக்கிய காரணம் ஆகும்!

உணவில் கவனத்துடன் பயன்படுத்தினால் இந்த இதய நோய்த் தாக்குதலைத் தவிர்க்க முடியும் என்று மருத்துவ அறிஞர்கள் கூறியதின் வடிகட்டிய சாரத்தை நாம் வாசகர்களுடன் பகிர்ந்து கொள்ள விழைகிறோம்.

1 )  கொழுப்பான மீன் வகையறாக்கள் நமது ஆரோக் கியத்திற்கு உகந்ததாகும். (சில மீன்களுக்கு இங்கே பெயரைக் கண்டறியுங்கள்) சால்மன் (Salmon), மெக்கிரல் (Mackerel) சார்டின் (Sardines) மீன்கள், டியூனா  (Tuna) போன்றவைகளை சாப்பிடுவது வரவேற்கத்தக்கது!

அமெரிக்க இதய நிபுணர்கள் சங்கத்தினர் இது போன்ற கெடுதியில்லா கொழுப்புள்ள (Unsaturated Fats)   ஓமேகா - 3 மீன்கள் கொழுப்பு அமிலத்தை, மற்ற சத்துக்களை தந்து நமது இதய நோய் தாக்குதலை எதிர்த்து 'தடுத்தாட் கொள்ளும்' திறன் படைத்தவை என்று கூறுகிறார்கள்!

குறிப்பாக Arrhythmia என்ற இதய இரத்த ஓட்டம் சீராக இல்லாத தடுக்கப்பட்டு தடுக்கப்பட்டு இதயத்திற்கு வருகின்ற நோய் - மாரடைப்பு (atherosclerosis) நோய்களைத் தடுக்க இவை உதவுகின்றன என்று கூறி பரிந்துரைக்கின்றனர்!

ஊட்டச்சத்து நிபுணர்கள் இத்தகைய மீன்கள் 99 கிராம்களை உண்ண (ஒரு வாரத்தில்  2-3 முறை உண்ணலாம்)  என்று அறிவுறுத்துகின்றனர்!

2) ஓட் மீல் (Oat meal - புல்லரிசிக் கூழ்) இந்த புல்லரிசிக்கூழ் - ஓட்ஸ் கஞ்சி மாதிரி நிறைய எளிதில் செரிமானம் ஆகக் கூடிய நார்ச் சத்துக்களை கொண்ட உணவாகும். கெட்ட கொழுப்புகளைக் கரைக்கும் "விரட்டும்" சக்தி இந்த 'ஓட்ஸ்'க்கு உண்டாம்!

அதுபோல குடற்புண் போன்றவை மற்றும்   Antioxidants போன்றவைகளாக வும் பயன்படும் இது ரத்த அழுத்தத்தை யும் ஒழுங்குபடுத்தும் சக்தி உடையதாகும்.

அதுபோலவே இரண்டாம் வகை சர்க்கரை நோய் (Type 2 Diabetes) த் தடுப்பும், எடை கூடாமல் இருக்கவும் இது பெரிதும் உதவுகிறது!

3) பெர்ரிஸ் - பெர்ரி பழங்கள்  மூன்று அளவு (Three Serving's) பழங்களை உண்ணுதல் ஒரு வாரத்தில் மாரடைப்பைத் தடுக்கிறது என்று ஈஸ்ட் ஆஞ்சிலியா பல்கலைக் கழகம் என்ற இங்கிலாந் தில் உள்ள ஒரு பல்கலைக் கழகத்தில் ஆய்வு மூலம் கண்டறிந்துள்ளனர்.

புளுபெர்ரீஸ், ஸ்டராமெர்ரீஸ் பழங்களில் இரத்த அழுத்தத்தைக் குறைக்கும் ஆந்தோ சயாநின் (anthocyanins) உள்ள தால் 32 சத விகித மாரடைப்பு அபாயத்தை இப்பழங்கள் குறைக்க உதவுகிறாம்.

(நாளையும் வளரும்)

- விடுதலை நாளேடு, 25.9.18

4). மாரடைப்பு, இதய நோய் தடுக்க கறுப்பு சாக்லேட்டுகள்

இந்த கறுப்பு சாக்லேட்டுகள் இதயத்தின் ரத்தக் குழாய்களை (Arteries)  இலகுவாக்கிடுகிறது (Flexible). ரத்தத்தின் வெள்ளை அணுக்கள் இரத்தக் குழாய்களின் சுவர்களில் ஒட்டிக் கொள்ளாமல் தடுக்கவும் உதவுகிறது. எனவே அளவோடு இந்த கறுப்பு சாக்கலேட்டுகளை சாப்பிடுவது, நமது இரத்தக் குழாய்களில் கெட்டிக் கறைகள் (Plaque) ஏற்படாமல் தடுக்கவும் உதவி செய்கிறது.

மூத்த மருத்துவப் பேராசிரியர் நமது டாக்டர் எம்.எஸ். இராமச்சந்திரன் அவர்கள் இதனை நம்மிடம் தெரிவித்ததோடு, இதில் "கோகோ" (Coca)  இருப்பதால் அது இதயத்திற்கு நல்லது; பால் சாக்லேட்டை (Milk Chocolate) தவிர்ப்பது அவசியம்.

இரண்டுக்கும் உள்ள வேறுபாட்டைப் புரிந்து கொண்டு, நாளும் ஓரிருமுறை கறுப்பு சாக்லேட்டை அளவுடன் சாப்பிட்டு வாருங்கள்.

5). கொட்டைகள் (Nuts)

அமெரிக்காவில் உள்ள இதய நோய் தடுப்புக்கான அமெரிக்கக் கல்லூரி ஒன்றின் ஆராய்ச்சி இதழில் (Journal) கொட்டைகளை நீங்கள் எவ்வளவுக் கெவ்வளவு நாளும் உண்ணுகிறீர்களோ, (அளவு வைத்துக் கொள்ள மறந்து விடாதீர்கள்) அது உங்கள் இருதயத்தை பலம் பெறச் செய்கிறது! பாதாம் பருப்பு  (Almonds) வால்நட்டுகள் (Wal Nuts) போன்றவை கொழுப்புச் சத்தில்லாத நல்ல அமிலங்களை உடல் நலத் திற்கேற்ப உற்பத்தி செய்வதில் பெரிதும் உதவுகின்றன.

பிற்பகலிலோ, மாலையிலோ உங்கள் சிறுதீனி  (Snacks) தேவைப்பட்டால் இவைகளை உண்ணலாமே!

6). எக்ஸ்ட்ரா வர்ஜின் ஆலிவ் ஆயில்

சுகாதாரத்துறை நிபுணர்களால் பரிந்துரைக்கப் படுவது இந்த எக்ஸ்ட்ரா வர்ஜின் ஆலிவ் ஆயில் என்ற ஆலிவ் ஸ்பெஷல் எண்ணெய். இதனை சமையலுக்குப் பயன்படுத்தினால் அதில் உள்ள "ஒமேகா - 3" மற்ற (Almonds) பாதுகாப்பு  சத்துக்கள் ரத்த அழுத்தத்தைக் குறைப்பதுடன், ஏதாவது குடற்புண் போன்றவை ஏற்படாமல், ரத்தம் கட்டி - உறைந்து விடாமல் (Prevents Blood Clotting) ஆகியவை களுக்கு உதவுகிறது.

7). சிவப்பு ஒயின் (Red Wine) - ரெட் ஒயின்

ரெட் ஒயினில் உள்ள ரிசர்வோட்டிரால் (Resveratrol) ரத்தக் குழாய்கள் பழுதடை யாமல் பாதுகாக்கிறது. அத்துடன் ரத்தம் உறை யாமல் தடுக்கவும் செய்கிறதாம்! இதனை ஒரு நாளுக்கு ஒரு கிளாஸ் (சிறிய அளவு - நிதானமான அளவு) பாவித்து வந்தால் இருதயம் இதய நோய் தாக்குதலுக்கு எதிர்ப்பு சக்தியின் இருப்பிடமாக வளர உதவுகிறது.

(இது எல்லோருக்கும் பொருந்தாது; மேலை நாட்டவர் போன்றவர் - மதுப் பழக்கம் இல்லாவிட்டாலும் மருந்தென கருதி குடிப்பவர்களுக்கு ஏற்கக் கூடிய தாகலாம்).

8). கிரீன் டீ

 

இதை நான் 'பச்சைத் தேநீர்' என்று மொழியாக்கம் செய்வதை பலரும் விரும்ப மாட்டார்கள். அச்சொல்லை அப்படியே வைத்தால் அனைவருக்கும் புரிந்த ஒன்றுதானே என்றுதான் கூறுவார்கள்.

அய்ரோப்பிய ஆய்வு இதழ் ஒன்றில்  (A research Journal, European Journal of Cardiovascular Prevention and Rehabilitation) கூறப்பட்டுள்ள கருத்து, இந்த கிரீன் டீ ரத்த ஓட்டத்தைச் சீராக்குவதுடன், குடித்த 30 நிமிடங்களில் அதை ஒழுங்குபடுத்தும் ஆற்றல் இதனிடம் உள்ளதாம்! இப்படி அது உடனடியாகச் செயல்படுவதற்கான வேகத்திற்கு மூல காரணம் அதனிடம் உள்ள Endothelial செல் செயல்படாமல் இருப்பதுதான் இதயக் குழாயில் ரத்த ஓட்டம்  - ரத்தம் உறைந்து தடுக்கும் நிலையை ஏற்படுத் தும் (This instant and fast result is because green tea targets the endothelial cell dysfunction which is responsible in the development  of clogged arteries) என்று அக்கட்டுரையில் கூறப்பட்டுள்ளது.

9). பச்சைக் கீரைகள்

ஊட்டச் சத்துபற்றி ஆய்வு நடத்தும் ஆராய்ச்சி இதழில் வெளி வந்துள்ள ஓர் கட்டுரையில் பச்சைக் கீரைகளான காலி, பார்சிலி, பிராக்லி, ஸ்பிரைச் (நம்மூரில் ஏராளமான கீரைகள் பட்டியலே உண்டு - இவை மேலை நாட்டுக் கீரைகள் பட்டியல் - அதனால் சிறு கீரை, முளைக் கீரை, பொன்னாங்கன்னி கீரை போன்றவைகளை நீங்கள் எடுத்துக் கொள்ளலாமே) இவைகளில் வைட்டமின் K என்பது ஏராளம் உள்ள தால், இதயத்திற்கு ரத்த ஓட்டம் செல்லும் ரத்தக் குழாயில் அடைப்புகளால் அது சேதமடையாமலும், கொலஸ்ட் ரால் அளவினைக் கூடாமல் தடுக்கவும், ரத்த அழுத்தம் கூடாமலும் பாதுகாக்கும் பணியை இவைகள் செய்யும் திறன் படைத்தவைகளாகும்!

10). அவோகேடா Avocado

இது ஓர் வகை பழம். நம்மூர் வெள் ளரிப் பழம் போன்றது.  monounsatu rated and polyunsaturated fats என்ற ஒருவகை உதவிடக் கூடிய நல்ல கொழுப்புச் சத்துகள் இதில் உள்ள படியால் கெட்ட கொலஸ்ட்ரால் உரு வாக இதய இரத்தக் குழாய்களை அடைத்து விடாத தடுப்புகளை போடும் பணி செய்வதாக இது அமைகிறது.

(நாளையும் வரும்)

- விடுதலை நாளேடு, 26.9.18

எழுத்துரு அளவு  

11). மாதுளைப் பழங்கள்

மாதுளைப் பழங்கள் இதயத்தைப் பாதுகாக்கும் வீரர்களைப் போன்றவர்கள் ஆகும்! இதயத்தின் ரத்தக் குழாய்களில் கொழுப்படைப்பு ஏற்படுத்துவதைத் தடுக்கும் சக்தி வாய்ந்த டானின்ஸ் மற்றும் ஆந்தோசை யானின்ஸ் (Tannins and Anthocyanins) சத்துகளை உள்ளடக்கியுள்ளதால் மாரடைப்புத் தடுப்பானாக இது உதவுகிறது. இருதயத்திற்குச் செல்லும் இரத்தக் குழாய் களை (Arteries) இது தூய்மைப்படுத்தவும் உதவுகிறது.

மேலே சுட்டிக்காட்டிய இரண்டு சத்துக்களும் சக்தி வாய்ந்த Anti - Atherogenic  -  'முகவர்கள்' போல் மாரடைப்பைத் தடுக்க பயன்படுகின்றன! கெட்ட கொலஸ்ட்ராலைத் தடுக்கவும் 'பிளாக்' (Plaque) களை முட்டு ஏற்பாடாமலும் தடுக்கவும் மாதுளை உதவுகிறது. ரத்த அழுத்தத்தைத் தடுக்கவும் மிகவும் உதவுவது, பசிக்கு இது ஒரு நல்ல சீறுதீனி (Snacks) யாகவும்கூட பயன்படுகிறது!

12). பட்டை (Cinnamon)

'லங்கபட்டை' என்றும் குடும்பங்களில் சமை யலுக்குப் பயன்படுத்துவதைக் குறிக்க இதனைச் சொல்வது உண்டு. கறி மசாலாக்களுக்குப் பயன்படுத்தும் வாசனைப் பொருள்கள் (Spices)  இவை. சாப்பாட்டில் இதனைச் சேர்ப்பது   (அளவோடுதான்). நாம் சாப்பிடும் சாப்பாட்டில் உள்ள கொழுப்புகளைக் குறைக்க இந்த பட்டை பெரிதும் உதவுகிறது! இது மூலிகை போன்றது. இதில் (antioxidant) சத்துகள் அதிகம் உள்ளதால் நமது உடம்பில் மெட்டபாலிசத்தை இது அதிகரித்து, கொழுப்புக் கூடுதலால் ஏற்படும் சிறு முட்டுகளை (தடுப்பு)  கரைத்துவிட பெரிதும் உதவுகிறது!

13). தர்பூசணி (Water Melon)

கொலஸ்ட்ராலைக் குறைக்கும் சக்தி திறன் கொண்ட  "லைகோ பீனி" (Lycopene) என்பது தர்பூசணி பழத்தில் அதிகம் உண்டு என்பதால் நல்ல கொலஸ்ட்ராலுக்கு எதிரானவைகளை அழிக்கும் அல்லது விரட்ட முயற்சித்து நமது இதயத்தில் பழுது ஏற்படுத்துவதைத் தடுக்க இது பெரிதும் உதவுகிறது! தர்பூசணி எடையை யும்கூட கூட்டாது; பசியையும் தணிக்கும். நமது இதயச் சுவர்களை கெட்டியாக்கிடும் இந்த தர்பூசணிப்பழம் உண்ணல் பெரிதும் நற்பயனை ஏற்படுத்தும்!

14). பூண்டு (Garlic)

நல்ல உணவின் சுவையை பூண்டு கூட்டுகிறது! ரத்த அழுத்தத்தைக் குறைக்க கட்டுப்படுத்தவும் நல்ல உணவு ஆகும் பூண்டு!

கெட்ட கொலஸ்ட்ராலைக் குறைக்கவும் செய்யும் பூண்டு ஒரு நார்ச் சத்தும் அதிகம் உள்ள உணவுப் பொருள் ஆகும்! இது செரிமானத்திற்கும் பெரிதும் துணை நிற்கக் கூடிய ஒன்று என்பதும் மருத்துவர்களின் கூற்று ஆகும்! உள்ளே ஏற்படும் தொண்டைப் புண்கள் (Inflammation)  முதலியனவற்றைத் தடுக்கவும் பெரிதும் உதவிடக் கூடும் என்பதால் பூண்டை அதிகமாகப் பயன்படுத்துவது நல்லது - ('அதிகமாக' என்ற நம் சொல்லாட்சிக்குச் சரியான பொருள் 'வரம்புமீறாமல்' என்பதேயாகும்!)

15). ஆப்பிள்களும் - பியர்களும் (Apples and Pears)

'நோய் கட்டுப்பாடு மய்யம்' (Center for Disease Control) என்ற அமைப்பின் கருத்துப்படி, 5  அளவீடு (Five Servings) ஒரு குறிப்பிட்ட அளவு - ஆப்பிள்களும், பியர்ஸ் பழங்களும் நாம் உண்ணுவதால் மாரடைப்பு, இதயநோய் வராமல் தடுக்க 'அவை பெரிதும்' நமக்கு உதவிகரமாக அமையும்.

பலரும் பயன்படுத்தும் ஆங்கில பழமொழியை அறிவீர்கள் அல்லவா? Saturated Fat என்ற கெட்ட கொழுப்பு ஆப்பிள், பியர்ஸ் போன்ற பழங்களில் மிகவும் குறைவாகவே உள்ளன. இதுபோலவே டிரான்ஸ் கொழுப்பு Trans Fat கெட்ட கொலஸ்ட்ரால் இவையும் மிகவும் உடலின் ஆரோக்கியத்தினைப் பாதுகாக்கத் துணை நிற்கும்! நார்ச்சத்தும் இவைகளில் அதிகம் உள்ளது. அதனால் செரிமானம் ஆவதற்கும் துணை நிற்கும்! உள்ளே எரிச்சல், புண்ணாவதை இவை தடுக்கும் சக்தி வாய்ந்தவை. ரத்த ஓட்டத்தைச் சீராக்கும் பணியையும் தவறாது இவை செய்கின்றன!

எனவே மேலே குறிப்பிட்ட 15 வகை ஆரோக்கிய நலத்திற்கு வாய்ப்பான உணவைச் சாப்பிட்டு மாரடைப்பு வராமல் உணவு முறை மூலம் உங்கள் உடலைப் பாதுகாத்து வாருங்கள்!

மனித வாழ்வின் நலத்திற்கு - 1) உணவு, 2) நடை முதலிய உடற்பயிற்சிகள், 3) ஓய்வு தூக்கம் - இளைப் பாறுதல் (Relaxation)  - இவைகளோடு தேவைப்படும் மருந்துகள், டாக்டர்கள் ஆலோசனையோடும்  - அதைவிட உங்கள் உடம்பு என்ன அறிவுறுத்துகிறது என்பதைப் புரிந்தும் செயல்பட்டு நீண்ட காலம் வாழ்ந்து, மனித சமுதாயத் "தொண்டறச் செம்மல்"களாக வாழ்ந்து, வாழ்க்கை பயனுறு வாழ்க்கையாக அமைந்தது என்று மகிழுங்கள்.(முடிந்தது)

- விடுதலை நாளேடு, 27.9.18

முதுமையை புதுமையாக்கிட 105 வயதான ஜப்பானிய டாக்டரின் மூதுரை - இதோ!(1,2&3)

ஜப்பான் நாடு 'உதய சூரியன் நாடு' என்று அழைக்கப்படும் நாடு.

அங்கே உள்ள மக்கள் தொகையில்  65 வயதானவர்களின் எண்ணிக்கை நான்கில் ஒரு பங்கு!

மகிழ்ச்சியுடன் வாழும் முதியவர்கள் பலரும் உண்டு. அங்கே 122 வயது வாழும் மூதாட்டியும்  உள்ளார்!

105 வயதான டாக்டர் ஷிகியாக்கி இனோஹாராஇதுவரை 150க்கு மேற்பட்ட புத்தகங்களை - "வாழும் கலை", "நீண்ட காலம் வாழ்வது", "நலமுடன் வாழ்வதெப்படி" என்பது போன்ற பல நூல்கள் அதில் அடங்கும்.

இவர் 'முதியவர்களின் புதிய இயக்கம்' என்ற ஒரு தனி இயக்கத்தின் நிறுவனர் ஆவார்!

உடல் நலத்துடனும் பலம் குன்றாமலும் இந்த 105 வயதிலும் உள்ள டாக்டர் இனோஹாரா அவர்கள் முதுமையைக் கண்டு அஞ்சாமல்,  அந்த முதுமையை வரவேற்று மகிழ்ச்சியுடன் வாழுவதற்குரிய 14 வழிமுறைகளை அவர் அறிவுரைக் கொத்தாக - பூங்கொத்து கொடுத்து மகிழ்விப்பது போல் மகிழ வைத்துள்ளார்! இதோ அந்த கருத்து முத்துக்கள்;

1) வியர்வையை வரவழைத்து - உடல் பலத்துடன் வாழுங்கள் முதுமையிலும் வியர்வை வெளியே வரும் வகையில் நமது உடல் நகர்ந்து கொண்டே - ஏதோ ஒன்றைச் செய்துகொண்டே இருங்கள்! மாடிப் படிகளில் ஏறி இறங்குங்கள்; உங்கள் உடமைகளை - பை போன்றவற்றைக்கூட - புத்தகங்களைக் கூட நீங்கள் பிறரிடம் தராமல் தூக்கிச் சென்று உடல் பலத்தை நாளும் இழக்காமல் கூட்டுங்கள். எஸ்கலேட்டர் - மின் படிகளில் ஏறுவதைவிட, படிகளில் நடந்து சென்றால் உங்களுக்குத் தேவையான வியர்வைத் துளிகள் உங்களுக்குப் பிறகு மகிழ்ச்சித் துளிகளாக மாறுவது நிச்சயம்!

2. உங்கள் டாக்டர் கூறுவதை அப்படியே கண்ணை மூடி ஏற்றுக் கொள்ளாதீர்கள். (அவரே ஒரு டாக்டராக இருந்தும் இப்படிக் கூற, அவர் தயங்கவில்லை!) உங்கள் டாக்டர் கூறும் எல்லாமே உங்களுக்கு ஏற்புடைத்தாக வேண்டும் என்பது உண்மை அல்ல. நீங்கள் உடல் நலவாழ்வு பற்றியும், நலம் பேணுவதுபற்றியும் உள்ள பல நூல்களைப் படியுங்கள். எல்லாவற்றுக்கும் மேலாக, உங்கள் உடல் என்ன சொல்கிறது என்பதற்கே முன்னுரிமை கொடுத்து அதனைப் புரிந்துசெயல்படுங்கள்.

உடல் அமைப்பு அவ்வப்போது தேவையான எச்சரிக்கைகளை - அறிவிப்புகளாக வெளியிடுவதை உன்னிப்பாக கவனித்து அதன்படி என்ன செய்ய வேண்டுமோ அதில் கவனம் செலுத்துங்கள். உடல் கூறுவதே முக்கியம்; டாக்டர் கூற்று அதற்குப் பிறகே! நமக்கு முதல் டாக்டர் நம் உடலே மறவாதீர்!

3. உங்கள் அறிவை, திரட்டும் தகவல்களை, அறியும் உண்மைகளை மற்றவர்களிடம் பகிர்ந்து கொள்ளத் தவறாதீர்கள்!

இந்த 105 வயதான டாக்டர் இனோஹாரா - ஜப்பான் முழுவதும் சுற்றுப் பயணம் செய்து - 100 சொற்பொழிவு களுக்கு மேல் நிகழ்த்தி வருகிறார்! வியப்பாக இல்லையா?

அதுவும் நின்று கொண்டே பேசுகிறார்!

இவரது சொற்பொழிவுகளின் மய்யக் கருத்து வாணிபத்தில் வெற்றி பெறும் மக்கள் பற்றியும், போரும் - அமைதியும் எப்படிப்பட்டவை, மற்றும் அவரது சொந்த வாழ்க்கை அனுபவங்கள்  - இவைகளே!

4. எளிதில் ஓய்வு (Retire) பெற்று விடாதீர்கள்.

உங்கள் உடலில் ஏதாவது ஓய்வோ, மனதில் ஏதும் ஊனமோ, மூளை நரம்பு சம்பந்தப்பட்ட நோயின் காரணமாக வேலைகளில்  தொடர முடியாத நிலை ஏற்பட்டால் ஒழிய எளிதில் ஓய்வு என்ற ரிடையர்மெண்ட் பற்றி நினைக்கவே நினைக்காதீர்கள். தன்னைப்போல ஒரு நாளில் 18 மணி நேரம்கூட - இந்த வயது முதுமை யிலும் உழைப்பதற்குத் தயங்கவே தயங்காதீர்கள்!

5. முன்கூட்டியே திட்டமிட்டு வாழுங்கள். திட்டமிடாமல் மனம் போனபோக்கில் நடந்தால் நமக்குத் தோல்வியும், வீழ்ச்சியும் தான் ஏற்படும்.

ஒரு நாளுக்கு முன்பே அடுத்த நாள் என்ன வேலைத் திட்டம், எப்படி அதை செலவிடுவது என்பதை நன்றாக யோசித்துத் திட்டமிட்டு வாழுங்கள்; இன்றேல் உங்களது வாழ்வு கெட்டுப் போனதாக ஆகிவிடக் கூடும்.

இவரின் (டாக்டர் இனோஹாரா அவர்களின்) முன்கூட்டியே திட்டமிட்டு வாழும் வாழ்க்கைக்கு ஒரு எடுத்துக்காட்டு இதோ:

2020 ஜப்பான் ஒலிம்பிக் விளையாட்டு போட்டியில் இவர் தனக்கென ஒரு வாய்ப்பையும், இடத்தையும்  ஒதுக்கி வைக்க வேண்டுகோள் விடுத்து இடத்தையும் பெற்றிருப்பதுதான்!

(நாளையும் தொடரும்)

- விடுதலை நாளேடு, 20.9.18

6. உங்கள் எடையை ஒழுங்குபடுத்தி வைத்துக் கொள்க!

அதிக கூடுதல் எடையும், ஊளைச்சதையும் நமது உடலில் இரத்த அழுத்தத்தையும் (B.P), அதன் விளைவாக பக்கவாதத்தையும் (Stroke)  உருவாக்கக் கூடும். (எனவே இந்த நோய்களிலிருந்து தப்பிடுவதற்கு சரியான வழி எடை நம் உடலுக்கும், உயரத்திற்கும் (BMI Body Mass Index) ஏற்றபடி உள்ள எடையை அவ்வப் போது விடாமல் கண்காணித்து வருவது மிகவும் அவசியமாகும்).

சரியான எடையை எப்போதும் சீராக வைத்திருப்ப தற்காக டாக்டர் இனோஹாரா அவர்கள் உணவுப் பழக்கத்தை ஒழுங்காக்கிக் கொள்வதில் அதிக கவனஞ் செலுத்துகிறார்.

ஒரு குவளை ஆரஞ்சு பழச்சாறு, காஃபி, ஆலிவ் எண்ணெய் என்பவை இவரது காலை உணவு (Breakfast) ;

குக்கீஸ் எனப்படும் ரொட்டித்துண்டு வகையறாவும், ஒரு குவளை பாலும் தான் இவரது மதிய உணவு (Lunch);

ஒரு குவளை சோறு, காய்கறிகள், மீன் - இவை தான் இவரது இரவு உணவு (Dinner);

கூடுமான வரை இவர் மெல்லிய இறைச்சியை 100 கிராம் வாரத்திற்கு இரு முறை எடுத்துக் கொள்கிறார்!

(அவரைப் பொறுத்தும், அந்நாட்டு உணவுப் பழக்க முறைகளையும், வயதையும் பொருத்து அது சரி; ஆனால் நம் நாட்டில் நீங்கள் மருத்துவ, ஊட்டச்சத்து உணவு வல்லுநர்கள் வழங்கும் ஆலோசனை  கருத்துப் படியும், உங்கள் உடல் ஏற்கும் வகையான உணவுகளைத் தேர்வு செய்து உண்ணுவதே உசிதம்).

7. உண்மையான உடலுக்கான சக்தி (Energy) என்பது 'நாம் நன்றாக இருக்கிறோம்' என்ற மகிழ்வுடன் கூடிய உணர்விலிருந்தே பிறக்கிறது.

இது உணவிலிருந்து உண்மையில் வருவதைவிட நம் மகிழ்ச்சியான உணர்விலிருந்தே ஊற்றெடுக்கிறது என்று கூறுகிறார் டாக்டர் இனோஹாரா அவர்கள்!

அதேபோல தூக்கமும்கூட இந்த உணர்வுக்கு மூல காரணமாக அமைவதில்லை என்கிறார் இந்த டாக்டர். நமது மன உற்சாகம்தான் அடிப்படை.

இதுபோன்ற ஆக்க ரீதியான சக்தியை முதுமை யடைந்தவர்கள் பெறுவதற்குரிய ஒரே வழி - குழந்தைகளைப் போல நாம் நடந்து கொண்டு, எந்த வித கட்டுப்பாட்டிற்கும், விதிமுறைகளுக்குட்பட்டும் நடக்காமல், தாராளமான விளையாட்டு பிள்ளைகளைப் போல அன்றாடம் நடப்பதே உற்சாகத்தை, சக்தியை நமக்கு அள்ளித் தருவதாக அமையக் கூடும்.

8. முதுமை என்பதைக் கண்டு பயப்படாதீர்கள்;

அதைப் பெருமையுடன் ஏற்று, சகஜமாகப் பழக உங்களை ஆயத்தப்படுத்திக் கொள்ளுங்கள் நண்பர் களே, வயது கூடி விட்டதே என்று கலங்காதீர்கள் - அஞ்சாதீர்கள். முதுமைக்கு வரவேற்புக் கூறி மகிழ்ச்சியுடன் அதனை எதிர் கொள்ளுங்கள்!

டாக்டர் இனோஹாரா தனக்கு முதுமை வந்து விட்டதே என்று சிறிதும் கவலைப்படவே இல்லை. (அது இயல்பான ஒன்று வாழ்வில் என்று புரிந்து கொண் டால் இப்படி கவலைப்படுவது முட்டாள்தனம் அல்லது அறியாமை என்பது  எவருக்கும் புரியுமே)

இவருக்கு வயது முதிர்ந்த நிலை ஏற்பட்ட பிறகும் கூட, ஒரு நாளில் 18 மணி நேரம் ஊக்கத்துடன், மகிழ்ச் சியுடன் இவர் வாழ்ந்து தான் வாழும் சமுதாயத்திற்கான தொண்டறப் பணிகளில் ஈடுபட்டு மகிழ்ச்சியுடன் காணப்படுகிறார்!

நாளும் 18 மணி நேர உழைப்பு!

அதுவும் ஏழு நாட்களும் (விடுமுறைக்கு விடுமுறை கொடுத்துவிட்ட மாமனிதர் இவர்)

இவ்வளவு 'சுறுசுறுப்புத் தேனீயாக' உழைத்து வாழும் இவர் தனது ஒவ்வொரு கணத்தையும் பயனுறும் வழியில் அனுபவித்து வருகிறாரே!

9. நீங்கள் ஒரு நல்ல எடுத்துக்காட்டானவர் 'Role Model' - ரோல் மாடலைத் தேர்வு செய்து, அவரைப்போல  முடிந்த அளவு நடந்து மகிழுங்கள்.

உழைப்பால் நமது கலைஞருக்கு ரோல் மாடல் தந்தை பெரியார் என்பதை ஈரோட்டு குருகுல வாசத்திலேயே புரிந்து, பின்பற்றத் தொடங்கி விட்டதால் -  94 வயது வரை உழைப்புத் தேனீயாக வாழ்ந்து வரலாறு படைத்து விட்டார் அல்லவா!

தனக்குச் சோதனை ஏற்படும் போதெல்லாம் இந்த டாக்டர் - தனது தந்தையாரை எடுத்துக்காட்டானவராகக் கொண்டவர் ஆனபடியால் - இந்த நேரத்தில் தனது தந்தை இந்த சோதனையை எப்படி எதிர் கொண்டி ருப்பார் என்று சிந்தித்து செயல்பட்டு, அதன் மூலம் அந்தச் சோதனையை தனது சாதனையாக மாற்றிடுவார் என்று கூறுகிறார்.

(என்னைப் பொருத்தவரை எனக்கு நம் அறிவு ஆசான் தந்தை பெரியார் அவர்கள் 'இத்தகைய சோத னையை எப்படி எதிர்கொண்டு, தீர்வு கண்டிருப்பார்' என்ற  பெரியார் தந்த புத்தியையே பயன்படுத்தி அதிலிருந்து மீண்டும் வருவதும் எனது நடைமுறை; அது வெற்றியே தந்துள்ளது என்பதை மிகுந்த அடக்கத்துடன் இங்கே பதிவு செய்கிறேன்)

10. எதற்கும் அதிகமாகக் கவலைப்பட்டு அலுத்துக் கொண்டு மனச்சோர்வடையாதீர்!

வாழ்க்கை என்பது எத்தனையோ எதிர்பாராத நிகழ்வுகளின் தொகுப்பேயாகும்!

எது நமது கட்டுப்பாட்டிற்கு அப்பாற்பட்ட ஒரு நிகழ்வாக  எதிர்பாராமல் ஏற்படும் போது - அதுபற்றி அதிகமாக கவலைப்பட்டு நாம் நம் சக்தியை - புத்தியை ஏன் வீணடித்துக் கொள்ள வேண்டும்? இது புத்திசாலித்தனம் அல்லவே!

டாக்டர் இனோஹாரா கூறுகிறார்:

சின்ன சின்ன அற்ப விஷயங்களுக்கெல்லாம் மனக் கவலை கொண்டு உழற்றிக் கொள்வது, தேவையற்ற ஒன்று மட்டுமல்ல; மன அழுத்தத்தையும் அது வெகுவாக உண்டாக்கி நமக்குத் தொல்லை தருவதாக அமையுமே! உடல் நலமும் மிக பாதிக்கப்படும்!

சில நிகழ்வுகள் நடப்பதைக் கண்டு நாம் அதிகம் அலட்டிக் கொள்ளாமல், அமைதியுடன் அதை அலட் சியம் செய்தோ அல்லது நிதானமாக யோசித்தாலோ தீர்வு தானே கிடைக்கும் என்ற நம்பிக்கையுடனோ வாழுதலே சிறந்தது என்கிறார் டாக்டர் இனோஹாரா.

(நாளையும் தொடரும்

- விடுதலை நாளேடு,21.9.18

 COMMENTS

11. விஞ்ஞானம் மட்டுமே மக்களுக்கு முழுத் தீர்வு கொடுத்து விடாது! என்கிறார்  டாக்டர் இனோஹாரா

நமது பார்வையும் பலவற்றை நோக்கி - பல்வேறு கலைகளை அனுபவித்து, இன்பு றுவது நம்மை ஆரோக் கியமாக வைத்துக் கொள் வதற்கு உதவக் கூடும். (ஓவியம், கவிபுனைதல், இலக்கிய  ரசனைகள் (Liberal Arts) போன்ற பலவற்றிலும்கூட ஈடு பட்டு முதுமையில் நாம் காலம் கழித்தால் அது மகிழ்ச்சியைத் தரும் என்ற பொருளை உள்ளடக்கமாகக் கொண்டே இந்த டாக்டர் இப்படி கூறுவதாகவே நமது விளக்கம் அமைதல் நல்லது. விஞ்ஞான விரோதக் கருத்தாக எடுத்துக் கொள்ள வேண்டியதில்லை).

12. பணமே வாழ்க்கையின் எல்லாமும் என்று ஆகிவிடாது - எப்போதும்!

பணம் சேர்ப்பதென்றே வாழும் பலருக்கு பணமே எல்லா முமாக இருப்பது மிகவும் கேடான மனப் பான்மையாகும்!

இந்த புத்திசாலி டாக்டர் கேட்கிறார் 'நான் என்ன எனது கல்லறைக்கு பணத்தையா என்னுடன் கொண்டு போகப் போகிறேன்' என்று. எனவே, எதற்கு வாழ்க்கையில் முன்னுரிமை தர வேண்டுமோ அதற்கு முன்னுரிமை தரும் வாழ்வே முழு வாழ்வாகும். எந்த நேரமும் பணத்தையே நினைத்து வாழும் மனிதர்கள் மகிழ்ச்சியுடன் வாழவே முடியாது!

(எப்போதும் பணம் நமது "வேலைக்காரனாக" இருப்பது முக்கியம்; அதை நம்மீது ஆதிக்கம் செலுத்தும் "எஜமானனாக்க" அனுமதியாதீர்; அனுமதித்தால் நாம் பண நோயாளிகளாகி, பிறகு மன நோயாளி  யாகி மரித்து விடும் நிலைதான் ஏற்படக் கூடும்)

13. வாழ்க்கை என்பதே  விசித்திரமான புதிராகவும், வலியைப் போல எப்போது, எப்படி வரும் என்று கூற முடியாதவாறு அமைவதே உண்மை என்கிறார் டாக்டர் இனோஹாரா அவர்கள்!

இந்த அனுபவக் களஞ்சியமான டாக்டர் கூறுகிறார்; "வலி என்பது வாழ்க்கையின் விசித்திர புதிர்களில் ஒன்று! மிகப் பெரிய எதிர்பாராத ஒன்று. அது எப்போது நமக்கு எப்படி ஏற்படும் என்பதை முன்கூட்டியே கூறிட முடியாது; எதிர்பார்க்கவும் முடியாது.

இந்த வலி, மனவலி, உடல் வலி போன்ற வலிகளை நாம் சிகிச்சைக்கு உட்படுத்தி குணப்படுத்தவும் முடியும்!

வலியுடன் அவதியுறுவோர் பக்கத்தில் அமர்ந்து இதமாகப் பேசுவது, யார்மீது அவர்கள் மிகுந்த அன்பும், நம்பிக்கையும் வைத்துள்ளார்களோ, பாசம் காட்டிடும் அவர்கள் கூறும் ஆறுதல் பாதிக்கப்பட்டவர்களின் வலியை நிச்சயம் போக்கும்; அல்லது குறைக்கும்; தனது செல்லப் பிராணிகளுடன் கொஞ்சுதல்; அது போலவே இசையைக் கேட்டு மகிழ்தல் இவைகளும் கூட வலியைப் போக்கும் மாமருந்துகளாகும்!"

14. எப்போதும் உற்சாகத்துடன் இருக்கப் பழகுங்கள்!

நமது இதயத்தின் நெருப்பின் கனல்வீச்சு எப்போதும் குறையாமல் இருக்க, நாம் உற்சாகமான உளப் போக்குடன் இருப்புது மிகவும் அவசியமாகும்! உள்ளு வதெல்லாம் உயர்வுள்ளல்; திட்டமிடுதல்; நல்ல கவிதை களைப் படித்துச் சுவைத்து மகிழ்தல்; மற்றவர்களின் கனிந்த அனுபவங்களை அவர்கள் சொல்ல, எழுத நாம் கேட்டும் - படித்தும் பயன் பெறுதல் நமது ஊக்கத்தையும் பெருக்கும்.

பழைய பழமொழி ஒன்று உண்டு. 'எதையும் முயற்சிப்பதில் தவறேதும் இல்லை' என்பதே அது!

எனவே, மேலே கூறிய 14 அம்சங்களை முயற்சி செய்து பாருங்கள் எனது முதிய நண்பர்களே என்கிறார் டாக்டர் இனோஹாரா. இதுபற்றிய எண்ணங்களையும், விமர்சனங் களையும் எனக்கே எழுதி அனுப்புங்கள் என்று திறந்த மனதோடு எழுதுகிறார் டாக்டர்.

எனவே, முதுமையை இரு கரங்கள் கூப்பி வரவேற்று அனுபவிக்கத் தயராவீர் முதியவர்களே! சலிப்பு, சங்கடம், விரக்தி வேதனை இவைகளுக்கு விடை கொடுத்து வாழ்க்கையை நாளும் இன்ப ஊற்றாக்கி மகிழுங்கள், நண்பர்களே!

(நிறைவு)

- விடுதலை நாளேடு, 22.9.18